పలాసలో 14 కిలోల వెండి లభ్యం

చెక్‌పోస్టు వద్ద పట్టుబడిన సామగ్రి
బిల్లులు లేకపోవడంతో సీజ్‌
పోలీసుల అదుపులో ముగ్గురు గుజరాత్‌ వాసులు
పలాస, మార్చి 6: పలాసలో 14 కిలోల వెండి సామగ్రి పోలీసులకు పట్టుబడింది. మునిసిపల్‌ ఎన్నికల సందర్భంగా  పలాస-కాశీబుగ్గలోని ప్రధాన రహదారి కూడలిలో పోలీసులు చెక్‌పోస్ట్‌ ఏర్పాటు చేశారు. కాశీబుగ్గ సీఐ శంకరరావు ఆధ్వర్యంలో విస్తృతంగా వాహనాలు తనిఖీ చేశారు. ఈ క్రమంలో శనివారం మధ్యాహ్నం గుజరాత్‌ రాష్ట్రానికి చెందిన వ్యాపారులు జస్వంత్‌సింగ్‌, దేవీలాల్‌సేన్‌, బ్రిజ్లారామ్‌ల వాహనంలో 14 కిలోల వెండి సామగ్రి పట్టుబడింది. సుమారు రూ.10 లక్షల విలువైన ఈ సామగ్రికి సంబంధించి పోలీసులు ఆరా తీశారు. అనకాపల్లి విజయలక్ష్మి జ్యూయలరీ దుకాణంలో ఈ సామగ్రి కొనుగోలు చేసి.. పలాసలో విక్రయించేందుకు తీసుకు వస్తున్నామని వ్యాపారులు తెలిపారు. కానీ, వాటికి సంబంధించిన బిల్లులు మాత్రం వారి వద్ద లేవు. ఈ నేపథ్యంలో ఆ ముగ్గురినీ అదుపులోకి తీసుకుని.. వెండి సామగ్రి స్వాధీనం చేసుకున్నామని సీఐ శంకరరావు తెలిపారు. తహసీల్దార్‌ ఎల్‌.మధుసూధనరావు సమక్షంలో వెండి సామగ్రిని సీజ్‌ చేసి.. శ్రీకాకుళం ప్రభుత్వ ఖజానా కార్యాలయానికి తరలించామన్నారు. ఎన్నికల నిబంధనల ప్రకారం సక్రమమైన బిల్లులు సమర్పిస్తేనే ఆ సామగ్రిని సంబంధిత వ్యక్తులకు అప్పగిస్తామని, లేకుంటే ప్రభుత్వానికి జమ చేస్తామని తెలిపారు.