అరచేతులు ఎందుకలా?

ABN , First Publish Date - 2020-11-13T05:30:00+05:30 IST

బీర్బల్‌ తన వాక్చాతుర్యంతో అక్బర్‌కు బాగా దగ్గరయ్యాడు. ఒకరోజు అక్బర్‌ మహారాజు బీర్బల్‌తో కలిసి సాయంత్రం వేళ పచార్లు చేస్తున్న సమయంలో అరచేతుల్లో వెంట్రుకలు ఎందుకు లేవని సందేహం వచ్చింది. వెంటనే ‘‘బీర్బల్‌... అరచేతుల్లో వెంట్రుకలు ఎందుకు లేవో చెప్పు?’’ అని అడిగాడు...

అరచేతులు ఎందుకలా?

బీర్బల్‌ తన వాక్చాతుర్యంతో అక్బర్‌కు బాగా దగ్గరయ్యాడు. ఒకరోజు అక్బర్‌ మహారాజు బీర్బల్‌తో కలిసి సాయంత్రం వేళ పచార్లు చేస్తున్న సమయంలో అరచేతుల్లో వెంట్రుకలు ఎందుకు లేవని సందేహం వచ్చింది. వెంటనే ‘‘బీర్బల్‌... అరచేతుల్లో వెంట్రుకలు ఎందుకు లేవో చెప్పు?’’ అని అడిగాడు. ‘‘జహాపనా! ప్రతిరోజు ఎంతో మంది పేదలకు మీరు రెండు చేతులతో దానం చేస్తున్నారు. అలాంటి చేతుల్లో ఇక వెంట్రుకలు ఎలా ఉంటాయి?’’ అని సమాధానం ఇచ్చాడు బీర్బల్‌. ఆ సమాధానం విన్న అక్బర్‌ సంతోషించాడు. కానీ వెంటనే అక్బర్‌కు మరో సందేహం వచ్చింది. ‘‘మరి నీ చేతుల్లో కూడా వెంట్రుకలు లేవు కదా?’’ అని అడిగాడు అక్బర్‌. అప్పుడు బీర్బల్‌ ‘‘మహారాజా! మీరిచ్చే బహుమతులను రోజూ తీసుకోవడం వల్ల వెంట్రుకలు లేకుండా పోయాయి’’ అని అన్నాడు. బీర్బల్‌ తెలివైన సమాధానాన్ని అక్బర్‌ మెచ్చుకున్నాడు. అయితే అక్కడితో ఊరుకోకుండా ‘‘రాజ్యంలో అందరి చేతుల్లో వెంట్రుకలు లేవు కదా! దానికేమంటావు?’’ అని కుతూహులంగా అడిగాడు. ‘‘మీ దగ్గర నుంచి నేను బహుమతులు తీసుకున్నప్పుడల్లా అందరూ అసూయతో చేతులు రుద్దుకుంటున్నారు. దానివల్ల వెంట్రుకలు లేకుండా పోయాయి’’ అని అన్నాడు బీర్బల్‌. ఆ సమాధానాలతో అక్బర్‌ సంతృప్తి చెందాడు. 

Updated Date - 2020-11-13T05:30:00+05:30 IST