Advertisement

తోటమాలికి బీర్బల్‌ సాయం!

Jun 30 2020 @ 00:00AM

ఒకరోజు అక్బర్‌ తోటలో పచార్లు చేస్తూ రాయి తగిలి కింద పడి పోయాడు. సేవకుల ముందు కింద పడిపోవడాన్ని అక్బర్‌ అవమానంగా భావించాడు. నిర్లక్ష్యంగా ఉన్నందుకు తోటమాలిని వెంటనే బంధించి, ఉరి తీయమని ఆజ్ఞాపించాడు. బీర్బల్‌కు జరిగిన విషయం తెలిసింది. తోట మాలిని బంధించి ఉంచిన జైలుకు వెళ్లాడు. అక్కడ తోటమాలి చెవిలో రహస్యంగా ఒక మాట చెప్పి వచ్చాడు. మరుసటి రోజు తోటమాలిని ఉరితీసేందుకు అంతా సిద్ధం చేశారు. చివరి కోరిక ఏదైనా ఉంటే అడగమని జైలు సిబ్బంది అడిగారు. అప్పుడు తోటమాలి ‘‘ఒక్కసారి రాజు గారిని చూస్తాను’’ అని అన్నాడు. అందుకు సరేనన్న సిబ్బంది రాజు కొలువుదీరి ఉన్న సభకు తీసుకెళ్లారు. వెంటనే తోటమాలి రాజు దగ్గరకు వెళ్లి ఆయన కాళ్లపై ఉమ్మి వేశాడు. జరిగింది చూసి సభికులందరూ ఆశ్చర్యపోయారు.


‘‘ఏమిటీ పిచ్చి పని!’’ అంటూ రాజు మరింత ఆగ్రహానికి గురయ్యాడు. అప్పుడు బీర్బల్‌ కలగజేసుకుని ‘‘జహాపనా! మీరు తెలివితక్కువ కారణంతో ఉరి తీస్తున్నారని తోటమాలి బాధపడుతున్నాడు. మీ నిర్ణయాన్ని ప్రజలు సైతం విమర్శించే అవకాశం ఉంది. అందుకే ఉరి తీయడానికి సరైన కారణం కావాలని అలా చేశాడు’’ అని వివరించాడు. అక్బర్‌కు విషయం అర్థమై, తోటమాలిని క్షమించి వదిలేశాడు.


Follow Us on:
Advertisement
Advertisement
అంతర్జాలంలో ప్రకటనల కొరకు సంప్రదించండి
For internet advertisement and sales please contact
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.