పింఛన్లలో కోత!

 

ప్రభుత్వం సంక్షేమ కార్యక్రమాల కోతల్లో భాగంగా బ్రాహ్మణ కార్పొరేషన ఫించన్లకు ప్రభుత్వం ఝులక్‌ ఇచ్చింది. కార్పొరేషన ద్వారా మంజూరయ్యే పింఛన్లను వృద్ధాప్య పింఛను జాబితాలో చేర్చింది. దీంతో ఒక ఇంట్లో ఒకే పింఛను విధానం ఆమల్లో ఉండటంతో వృద్ధాప్య పింఛనుకు కోత పడుతోంది. ఇలా వేలమంది లబ్ధిదారులకు పింఛనుకు దూరమయ్యారు. తాజాగా ప్రభుత్వం బ్రాహ్మణ కార్పొరేషననుబీసీ కార్పొరేషనలో విలీనం చేయడంపైనా ఆందోళన వ్యక్తం అవుతోంది. 

మత్యకారులు, చేనేత కార్మికులు, గీత కార్మికులకు పింఛను ఇస్తున్నారు. అదే ఇంట్లో వృద్ధులు, వితంతువులు ఉన్నా సరే రెండో పింఛను మంజూరు చేస్తున్నారు. బ్రాహ్మణులు చేసేది గత ప్రభుత్వం ఒక వృత్తిగానే భావించింది. వయసు పైబడిన వారికి, అనాథ పిల్లలకు నెలకు రూ.2వేలు పింఛన అందించేది. వృద్ధాప్యం వచ్చిన తర్వాత పూజాధిక కర్మలు చేయలేరన్న ఉద్ధేశంతో కార్పొరేషన ద్వారా వృద్ధులకు పింఛను జారీ చేసేది. బ్రాహ్మణ కార్పొరేషన ద్వారా ఇచ్చే పింఛనును ఇప్పుడు వృద్ధాప్య పింఛను జాబితాలో చేర్చేశారు. దీంతో ఒక ఇంట్లో రెండు పెన్షన్లు ఉంటే ఒకటిపోయింది. ఇతర వృత్తిదారుల విషయంలో లేని ఇబ్బందులు  పురోహితుల విషయంలో ఎందుకు వచ్చాయన్న విమర్శలు, వెల్లువెత్తుతున్నాయి. ఒక్క బ్రాహ్మణ సామాజిక వర్గంలోనే జిల్లాలో దాదాపు మూడువేల మందికి పింఛన్లు నిలిచిపోయాయి. రాష్ట్ర ప్రభుత్వం ఆర్థిక భారాల నుంచి తప్పించుకోవడానికి పింఛన్లలో కోత విధిస్తోందంటూ ప్రతిపక్షాలు ఆరోపిస్తున్నాయి.