Advertisement

అడవి దున్నలు చెప్పిన బతుకు పాఠం.. వైరల్ వీడియో..!

Sep 27 2020 @ 11:58AM

ఇంటర్నెట్ డెస్క్: ఉచ్చు బిగిసింది.. అంతా రెడీ.. సింహాలన్నీ కాచుకుకూర్చున్నాయి. అదను కోసం ఎదురు చూస్తున్నాయి. అడవి దున్నల గుంపే వాటి టార్గెట్! దున్నలు కూడా పొంచి ఉన్న ప్రాణాపాయాన్ని గ్రహించాయి. నోరు తెరిచిన మృత్యువును గమనించాయి! చావు బతుకుల ఆట మొదలైంది.


అయితే ప్రకృతి ఎంతో చిత్రమైనది.. జయాపజయాలకి, చాపు పుట్టుకులకు ఇక్కడ సమానావకాశాలు ఉంటాయి. ఎక్కువతక్కువలకు చోటు ఉండదు! మరణం ఖాయం అనుకున్న సందర్భాల్లో నూరేళ్ల జీవితం లభిస్తుంది. అంతా హ్యాపీ అనుకున్న టైంలో మొత్తం తల్లకిందులవుతుంది.

Advertisement

ఇక్కడ కూడా అదే జరిగింది. పంజా విసురుదామనుకుంటున్న సింహాలకు ఊహించని షాక్! అడవి దున్నల మంద సింహాలపై యుద్ధం ప్రకటించింది. భూమి దద్దరిల్లేలా దున్నలన్నీ ఒక్కసారిగా సింహాల వైపు కదను తొక్కాయి. వాటి వాడి కొమ్ములు...భారీ కాయాలు చూసిన మృగరాజుల గుండే జారిపోయింది. ఉచ్చులు, పంజా విసరటాలు మర్చిపోయి.. అవి ప్రాణ భయంతో అక్కడి నుంచి తుర్రుమన్నాయి. 

ఇదీ ఆఫ్రికా అడవుల్లో ఇటీవల జరిగిన ఉదంతం. అక్కడి సఫారీకి వెళ్లిన కొందరు టూరిస్టులు తీసిన వీడియోను అటవీ శాఖ అధికారి సుశాంత నందా ట్విట్లో షేర్ చేశారు. ఈ వీడియో ప్రస్తుతం నెటిజన్లను విశేషంగా ఆకట్టుకుంటోంది.


ఇటువంటి దృశ్యాలు సాధారణమే అయినా ఇందులోని నీతి మాత్రం నెటిజన్ల దృష్టి దాటిపోలేదు. దున్నలు చెప్పుతున్న బతుకు పాఠం తాము గుర్తించామంటూ తెగ కామెంట్లు చేస్తున్నారు. ఐకమత్యంతో అద్భుతాలు సాధ్యం అని ఒకరంటే..కలసి ఉంటేనే విజయం తథ్యం అని మరొకరు వ్యాఖ్యానించారు. ఈ వీడియోకు ఇప్పటి వరకూ ఐదు వేలకు పైగా వ్యూస్ వచ్చాయి. 


Follow Us on:
Advertisement
Advertisement