కెనడాలో కలకలం.. మసీదులో ప్రార్థనలు చేస్తున్న వారిపై..

ఎన్నారై డెస్క్: మసీదులో ప్రార్థిస్తున్న వారిపై ఓ యువకుడు దాడి చేశాడు. చేతిలో కొడవలి, బేర్ స్ప్రే(కారం పొడి జల్లే స్ర్పే) తీసుకుని మసీదులో ప్రవేశించి అక్కడున్న వారి అకస్మాత్తుగా కళ్లలో కారంపొడి కొట్టాడు. టోరొంటో నగరంలోని మిస్సిసాగా ప్రాంతంలో శనివారం ఈ దాడి జరిగింది. అయితే.. ఈ ఘటనతో మసీదులోని వారెవరికీ తీవ్ర గాయాలు కాలేదని స్థానిక పోలీసులు తెలిపారు. నిందితుడు దాడికి తెగబడగానే..అక్కడున్న వారందరూ వేగంగా స్పందించి అతడిని అదపులోకి తీసుకున్నారు. పోలీసులు వచ్చే వారు నిందితుడిని కదలకుండా నిర్బంధించారు. 

అనంతరం పోలీసులు ఆ యువకుడిని అదుపులోకి తీసుకున్నారు. బేర్ స్ప్రే కారణంగా కొందరికి చిన్నపాటి గాయాలయ్యాయి. పోలీసులు దీన్ని ద్వేషపూరిత దాడిగా అనుమానిస్తున్నారు. కాగా.. ఈ దాడిని కెనడా ప్రధాని జస్టిన్ ట్రూడో ట్విటర్ వేదికగా ఖండించారు. ఇది చాలా ఆందోళనకరమని వ్యాఖ్యానించారు. కెనడాలోని ప్రధాన రాజకీయ నాయకులందరూ ఈ దాడిని ముక్తకంఠంతో ఖండించారు. కాగా.. జూన్‌లో ఒంటారియో నగరంలో ఓ వ్యక్తి ఓ పాకిస్థానీ కుటుంబాన్ని కారుతో ఢీకొట్టి నలుగురు మృతికి కారణమైయ్యాడు. ఓ మతంపై ద్వేషంతో చేసిన దాడిగా పోలీసులు అప్పట్లో కేసు నమోదు చేశారు.