చినజీయర్ క్షమాపణ చెప్పాలి: పరిపూర్ణానంద
ABN , First Publish Date - 2022-03-18T00:25:40+05:30 IST
సమ్మక్క-సారలమ్మలపై చినజీయర్స్వామి చేసిన వ్యాఖ్యలు పెను దుమారం రేపుతున్నాయి. చినజీయర్ దిష్టిబొమ్మలను తగలబెడుతున్నారు.
హైదరాబాద్: సమ్మక్క-సారలమ్మలపై చినజీయర్స్వామి చేసిన వ్యాఖ్యలు పెను దుమారం రేపుతున్నాయి. చినజీయర్ దిష్టిబొమ్మలను తగలబెడుతున్నారు. ఆదివాసి, దళిత సంఘాల నేతలు ఆయనపై పోలీసులకు ఫిర్యాదు చేస్తున్నారు. ఓ అడుగు ముందుకేసి చినజీయర్పై ఎస్సీ, ఎస్టీ యాక్ట్ నమోదు చేయాలని డిమాండ్ చేస్తున్నారు. ఈ నేపథ్యంలో సమ్మక్క-సారలమ్మలపై చినజీయర్స్వామి వ్యాఖ్యలను స్వామి పరిపూర్ణానంద ఖండించారు. గురువారం ఆయన మీడియాతో మాట్లాడుతూ హిందు సమాజానికి చినజీయర్ క్షమాపణ చెప్పాలని డిమాండ్ చేశారు. సమ్మక్క-సారలమ్మను కోట్ల మంది ఆరాధిస్తున్నారని తెలిపారు. సమ్మక్క-సారలమ్మ పేరుతో బ్యాంక్లు పెడితే తప్పేంటి? అని ప్రశ్నించారు. చినజీయర్ వ్యాఖ్యలపై స్వామీజీలు స్పందించాలని పరిపూర్ణానంద డిమాండ్ చేశారు.
సమ్మక్క-సారలమ్మలపై చినజీయర్ గతంలో ఏ సందర్భంగా మాట్లాడారో తెలియదు గానీ కొన్నిరోజులుగా ఆ వ్యాఖ్యల తాలూకు వీడియో ఒకటి ఫేస్బుక్, వాట్సాప్లో తిరుగుతోంది. ఆ ‘‘అసలు సారక్క, సమ్మక్క ఎవరు? పోనీ.. దేవతలా? బ్రహ్మ లోకం నుంచి దిగొచ్చిన వారా? ఏమిటీ చరిత్ర? అదేదో ఒక అడవి దేవత. ఏదో గ్రామ దేవత. చదువుకున్నవాళ్లు.. పెద్ద పెద్ద వ్యాపారస్తులు, ఆ పేర్లతో బ్యాంకులు పెట్టేశారు. దట్ బికేమ్ ఏ బిజినెస్ నౌ (అది ఇప్పుడో వ్యాపారమైపోయింది)’’ అని వీడియోలో చినజీయర్ అన్నారు. వీడియోలో ఆయన మాట్లాడిన మాటలపై ఆదివాసీ భక్తులు, వివిధ పార్టీ నేతలు తీవ్ర ఆగ్రహావేశాలు, నిరసన వ్యక్తం చేస్తున్నారు. చినజీయర్ వెంటనే క్షమాపణలు చెప్పాలని డిమాండ్ చేస్తున్నారు.