కరుణా హృదయుడు
ABN , First Publish Date - 2021-05-15T05:52:08+05:30 IST
ఓ గర్భిణి ఆసుపత్రి నుంచి ఇంటికి వెళ్లేందుకు ఇబ్బంది పడుతుండటంతో టు టౌన్ సర్కిల్ ఇన్స్పక్టర్ కరుణాకర్ స్పందించారు.
మానవత్వం చాటిన టు టౌన్ సర్కిల్ ఇన్స్పెక్టర్ కరుణాకర్
ఆసుపత్రికి వచ్చిన గర్భిణిని సొంత ఖర్చుతో ఇంటికి పంపిన పోలీస్
ఖమ్మం క్రైం, మే 14: ఓ గర్భిణి ఆసుపత్రి నుంచి ఇంటికి వెళ్లేందుకు ఇబ్బంది పడుతుండటంతో టు టౌన్ సర్కిల్ ఇన్స్పక్టర్ కరుణాకర్ స్పందించారు. సొంత ఖర్చుతో ఆమెను ఆటోలో ఇంటికి పంపి మానవత్వాన్ని చాటుకు న్నారు. చింతకాని మండలం ముష్టికుంట గ్రామానికి చెంది న శైలజ తొమ్మిది నెలల గర్భిణి. ఆసుపత్రిలో చూపించు కునేందుకు ఖమ్మం జిల్లా కేంద్రంలోని ఇల్లెందు క్రాస్ రోడ్డులో ఉన్న ఓ ప్రైవేటు ఆసుపత్రికి తన తల్లితో కలిసి శుక్రవారం ఉదయం వచ్చారు.ఆసుపత్రిలో చూపించుకునే సరికి మధ్యాహ్నం అయింది. లాక్డౌన్ కావడంతో ఇంటికి వెళ్లేందుకు వాహనాలు ఏమీ లేవు. దీంతో రోడ్డుపై ఎండలో గంటన్నర పాటు నిల్చున్నారు. ఆప్రాంతంలోనే విధుల్లో ఉన్న టు టౌన్ సీఐ కరుణాకర్ వారిని గమనించి వివరాలు తెలుసుకున్నారు. వెంటనే చెక్పోస్టు వద్ద ఉన్న టెంటు కింద కూర్చోపెట్టారు. కొద్ది సేపటి తర్వాత ఓఆటో డ్రైవర్ను పిలిచి వారిని ఆటో ఎక్కించారు. వారివద్ద డబ్బులు తీసుకోవద్దని చెప్పి సీఐ ఆ డ్రైవర్కు సొంతంగా కిరాయి డబ్బులు ఇచ్చి పంపారు. ‘అయ్యా మీకు దండం..’ అంటు ఆ గర్భిణి తల్లి కన్నీటి పర్యంతమైంది. ఇది చూసిన సిబ్బంది సీఐకి సెల్యూట్ చేసి అభినందించారు.