కొత్త వేరియంట్ల పుట్టుకకు పరిస్థితులు అనుకూలంగా ఉన్నాయి: డబ్ల్యూహెచ్ఓ‌ హెచ్చరిక

ఇంటర్నెట్ డెస్క్: కొత్త కరోనా వేరియంట్లు పుట్టుకు వచ్చేందుకు ప్రస్తుత పరిస్థితులు అత్యంత అనుకూలంగా ఉన్నాయని ప్రపంచ ఆరోగ్య సంస్థ చీఫ్ టెడ్రోస్ అథానమ్ తాజాగా హెచ్చరించారు. ఈ కొత్త వేరియంట్లు ప్రమాదకరంగా ఉండొచ్చని, వేగంగా వ్యాపించవచ్చని కూడా ఆయన పేర్కొన్నారు. ‘కరోనాను అంతం చేసే మార్గాలు’ అనే అంశంపై శుక్రవారం జరిగిన ఓ చర్చా కార్యక్రమంలో ఆయన ఈ విషయాన్ని వెల్లడించారు.  ఒమైక్రాన్ తీవ్రత తక్కువగా ఉండటం, అత్యధిక శాతం మంది టీకా తీసుకొని ఉండటం.. వెరసి కొన్ని దేశాల్లో కొవిడ్ సంక్షోభం ముగిసిందనే ప్రమాదకర అంచనాకు కారణమవుతున్నాయని ఆయన ఆందోళన వ్యక్తం చేశారు.

అయితే.. కరోనా సంక్షోభానికి ఈ ఏడాదిలోనే ముగింపు పలకొచ్చని, ఇందుకు కావాల్సిన ఉపాయాలు, సాధనాలు అందుబాటులో ఉన్నాయని కూడా తెలిపారు. కరోనా టీకాలు, టెస్టులు, చికిత్సా విధానాలు వంటివి ప్రపంచవ్యాప్తంగా అందుబాటులోకి తీసుకొచ్చేందుకు అవసరమై 16 బిలియన్ డాలర్ల నిధులు సమకూర్చాలంటూ వివిధ దేశాలను ఆయన అభ్యర్థించారు.