Advertisement

వివాదాస్పదంగా నోముల ఫేక్‌ ఆడియో

Dec 3 2020 @ 01:41AM

 పోలీసులకు కుటుంబసభ్యుల ఫిర్యాదు

 నోములతో అనుబంధం మేరకే చేశానన్న ఓ కళాకారుడు

 క్షమాపణ కోరడంతో కేసు ఉపసంహరణ 

నల్లగొండ, డిసెంబరు 2 (ఆంధ్రజ్యోతి ప్రతినిధి): ఎర్రజెండా బిడ్డగా తనను సాగనంపాలంటూ ఎమ్మెల్యే నోముల నర్సింహయ్య చెప్పినట్లుగా సామాజిక మాధ్యమాల్లో ఓ ఆడియో వైరల్‌ అయింది. ఇది టీఆర్‌ఎస్‌, సీపీఎం, వామపక్ష అభిమానుల్లో చర్చకు దారి తీసింది. ‘మీ ఎర్రజెండా బిడ్డగా కోరుకునేది ఒక్కటే, మీ అందరినీ ఎడబాసి ఏడేళ్లు గడిచింది, ఈ ఏడేళ్లలో ఏడేడు లోకాలకు అందకుండా పోతానని ఎప్పుడూ అనుకోలేదు, ఆ పరిస్థితి వస్తుందని కూడా నేను ఎప్పుడూ కలగనలేదు, ఆ భగవంతుడు పిలిచినాడు, నేను వెళతావున్నా, మీరందరూ మీ నర్సింహయ్యగా నా అంతిమ సంస్కారాన్ని నిర్వహిస్తారని మనస్ఫూర్తిగా కోరుకుంటున్నాను. ఏది ఏమైనా మీరు కమ్యూనిస్టు బిడ్డలుగా ఉండాలని కోరుకుంటూ సెలవు’ అని ఆ ఆడియోలో ఉంది.


కాగా ఈ ఆడియోపై నోముల కుమారుడు భగత్‌ స్పందించారు. ‘మా నాన్న బతికున్నప్పడు ఇబ్బంది పెట్టిన కొందరు ఇప్పుడు సైతం ఇబ్బంది పెడుతున్నారు’ అని ఆవేదన వ్యక్తం చేశారు.  ఫేక్‌ ఆడియో వైరల్‌పై చర్యలు తీసుకోవాలని జిల్లా ఎస్పీ రంగనాథ్‌ను ఆయన కోరారు. కాగా ఈ ఆడియో వివాదాస్పదం కావడంలో అందులోని గొంతు తనదేనంటూ కోదాడ ప్రజానాట్యమండలి మాజీ కళాకారుడు కొండల్‌  పేర్కొన్నారు. పాతికేళ్లుగా నోములతో ఉన్న అనుబంధంతోనే ఆయన గొంతుతో మిమిక్రీ చేశానని చెప్పారు. ఈ మేరకు ఆయన మరో ఆడియో విడుదల చేశారు.

గతంలో ప్రజానాట్య మండలి, కమ్యూనిస్టు పార్టీల్లో పనిచేశానని, స్వతహాగా మిమిక్రీ కళాకారుడినని, ఉమ్మడి నల్లగొండ జిల్లా కళాకారులమంతా ఓ వాట్సాప్‌ గ్రూప్‌ పెట్టుకున్నామని తెలిపారు. నర్సింహయ్య మనతో ఉంటే ఎలా ఉండేదని గుర్తుచేసుకుంటూ అందరూ మిమిక్రీ చేయమని కోరడంతోనే ఆయన గొంతుతో మిమిక్రీ చేశానన్నారు. కొంతమంది ఆ ఆడియోను వైరల్‌ చేయడంతో నోముల కుటుంబం కలత చెందిందని తెలిసిందన్నారు. నోముల కుటుంబసభ్యులు తనను క్షమించాలని.. శిరస్సు వంచి నమస్కరిస్తున్నానని కోరారు. దీంతో  నోముల కుమార్‌ భరత్‌ కేసు నమోదు చేయొద్దంటూ  ఎస్పీ రంగనాథ్‌కు తెలపడంతో కథ సుఖాంతమైంది. 


Follow Us on:
Advertisement
అంతర్జాలంలో ప్రకటనల కొరకు సంప్రదించండి
For internet advertisement and sales please contact
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.