అంబరాన్నంటిన వజ్రోత్సవాలు
ABN , First Publish Date - 2022-08-15T05:22:32+05:30 IST
సిద్దిపేట పట్టణంలోని కోమటి చెరువు వద్ద ఓపెన్ ఆడిటోరియంలో ఆదివారం రాత్రి నిర్వహించిన స్వాతంత్య్ర వజ్రోత్సవాలు అంబరాన్నంటాయి.
ఆకట్టుకున్న సాంస్కృతిక కార్యక్రమాలు
హాజరైన సినీహీరో జొన్నలగడ్డ సిద్ధూ
సిద్దిపేట టౌన్, ఆగస్టు 14: సిద్దిపేట పట్టణంలోని కోమటి చెరువు వద్ద ఓపెన్ ఆడిటోరియంలో ఆదివారం రాత్రి నిర్వహించిన స్వాతంత్య్ర వజ్రోత్సవాలు అంబరాన్నంటాయి. దేశభక్తి గీతాలపై కళాకారుల సాంస్కృతిక ప్రదర్శనలు అందరిని ఆకట్టుకున్నాయి. జానపద గాయని కనకవ్వ తన పాటలతో అలరించారు. మై విలేజ్ షో ఫేం అనిల్ సభనుద్దేశించి మాట్లాడారు. కోమటిచెరువు వద్ద నిర్మించిన నెక్లెస్ రోడ్డు రెండవ దశను సినీహీరో జొన్నలగడ్డ సిద్ధూ(డీజే టిల్లు)తో కలిసి రాష్ట్ర ఆర్థిక, వైద్య ఆరోగ్య శాఖ మంత్రి హరీశ్రావు ప్రారంభించారు. చెరువు కట్టపై 360 డిగ్రీ సెల్ఫీ పాయింట్ను ప్రారంభించారు. ఈ సందర్భంగా సిద్ధూ మంత్రి హరీశ్రావుతో సెల్ఫీ దిగారు. హార్డ్వర్కర్ అయిన మంత్రి హరీశ్రావు కృషి వల్లే సిద్దిపేట అభివృద్ధి చెందిందని, సిద్దిపేట అభివృద్ధిని చదివానని ఇప్పుడు స్వయంగా చూస్తున్నట్లు చెప్పారు. సిద్దిపేట మంచి పర్యాటకరంగంగా అభివృద్ధి చెందిందని, చెరువు కట్టపై వాకింగ్ చేసేందుకు వాకింగ్ ట్రాకింగ్ నిర్మించడం అభినందనీయమని ఆయన అన్నారు.