Viral video: నీటిలో పడిపోయిన జింకను రక్షించేందుకు ఆ ఏనుగు ఏం చేసిందంటే..

అది తను కని, పెంచిన జీవి కాదు.. అసలు తన జాతే కాదు.. అయినా ఒక జంతువు ప్రాణాపాయ స్థితిలో పడడం చూసి ఆ ఏనుగు హృదయం తల్లడిల్లింది.. జూ సిబ్బందిని వెంటనే అప్రమత్తం చేసి ఆ జీవిని కాపాడిన తర్వాతే ఆ ఏనుగు మనసు శాంతించింది.. ఎంతో మంది నెటిజన్ల హృ‌దయాలను తాకిన ఈ వీడియో సోషల్ మీడియాలో బాగా వైరల్ అవుతోంది. గ్వాటెమాల సిటీలోని `లా అరోరా` జూలో ఈ ఘటన జరిగింది. 

 గ్వాటెమాల సిటీలోని `లా అరోరా`జూలో ఉన్న చిన్న చెరవులో ఓ జింక పడిపోవడాన్ని అదే జూలో ఉండే ట్రోంపిటా అనే ఏనుగు చూసింది. ఆ చెరవులోంచి బయటకు వచ్చే అవకాశం లేక, మునిగిపోతున్న ఆ జింకను రక్షించేందుకు ఏనుగు తీవ్రంగా ప్రయత్నించింది. గట్టిగా ఘీంకరించి జూ సిబ్బందిని అప్రమత్తం చేసింది. ఏనుగు కేకలు విన్న జూ సిబ్బంది ఒకరు పరుగున వచ్చి చెరువులో ఉన్న జింకను రక్షించారు. ఈ దృశ్యాన్ని జూకు వెళ్లిన మరియా డియాజ్ అనే యువతి తన సెల్ ఫోన్‌లో చిత్రీకరించింది. అనంతరం ఆ వీడియోని సోషల్ మీడియాలో పోస్ట్ చేయగా అది బాగా వైరల్ అయింది.