పాపం ఎలుగుబంటి!

Jun 13 2021 @ 00:00AM

ఒక చిట్టడవిలో ఒక ఎలుగుబంటి నివసించేది. అనారోగ్యంగా ఉండటంతో చాలా రోజులుగా అది గుహ నుంచి బయటకు రాలేదు. ఒకరోజు బాగా ఆకలి వేయడంతో వేట కోసం బయటకు వచ్చింది. దగ్గరలో ఉన్న నది దగ్గరకు వెళ్లి చేపలు పట్టుకుని తినాలని అనుకుంది. నెమ్మదిగా వెళ్లి నది ఒడ్డున కూర్చుంది. కాసేపయ్యాక చేప కనిపించడంతో ఠక్కున పట్టేసింది. కానీ ‘‘ఈ చేప చాలా చిన్నగా ఉంది. ఈ చేపతో నా కడుపు నిండదు. పెద్ద చేపను పట్టుకుంటాను’’ అని మనసులో అనుకుని దొరికిన ఆ చిన్న చేపను వదిలేసింది.


కాసేపయ్యాక మరో చేప దొరికింది. కానీ అది కూడా చిన్నదే. సాయంత్రం కావస్తున్నా ఒక్క పెద్ద చేప దొరకలేదు. చాలా చేపలు దొరికినా అన్ని చిన్నవే కావడంతో తిరిగి నీటిలో వదిలేసింది. చివరకు సూర్యాస్తమయం అయింది. ఎలుగుబంటి ఖాళీ కడుపుతోనే ఉండిపోయింది. చిన్న చేపలన్నింటినీ తిన్నా కడుపు నిండేది అని మనసులో అనుకుంటూ గుహకు చేరుకుంది. వచ్చిన అవకాశాలను వదులుకోకూడదు అన్నది ఈ కథలో నీతి. 

Follow Us on:
అంతర్జాలంలో ప్రకటనల కొరకు సంప్రదించండి
For internet advertisement and sales please contact
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.