హిమపాతం నుంచి రక్షణ కోసం...

యూరప్‌లోని ఒక చిన్నదేశం ఐస్‌లాండ్‌. ఈ దేశంలో సముద్రపు ఒడ్డున ఫ్లాటెరి అనే ఒక చిన్న గ్రామం ఉంది. వేసవిలో ఇక్కడి వాతావరణం ఎంతో ఆహ్లాదంగా ఉంటుంది. చలికాలం వచ్చిందంటే మాత్రం భయానక పరిస్థితులు కనిపిస్తాయి. అందుకే అక్కడి ప్రజలంతా కలిసి ‘ఎ’ ఆకారంలో ఒక గోడ నిర్మించుకున్నారు. ఆ విశేషాలు ఇవి..

• ఓ వైపు కొండలు, మరోవైపు సముద్రం, మధ్యలో గ్రామం. శీతాకాలంలో ఆ కొండలు మంచుతో నిండిపోతాయి. ఊహించని హిమపాతం ఆ ఊరిని ముంచెత్తుతుంది.
• 1995లో ఒకసారి ఊరంతా నిద్రలో ఉన్న సమయంలో హిమపాతం ముంచెత్తింది. ఎటు చూసిన మంచు, రాళ్లతో బీభత్సం సృష్టించింది. ఆ రోజు ఇరవై మంది చనిపోయారు.
• దాంతో మరోసారి అలా జరగకుండా ఉండటం కోసం ఊరి ప్రజలంతా కలిసి ‘ఎ’ ఆకారంలో గోడను నిర్మించుకున్నారు. 600 మీటర్ల పొడవు, 20 మీటర్ల ఎత్తుతో గోడను నిర్మించారు. మధ్యభాగం డ్యామ్‌లా ఉపయోగపడేలా చేశారు.
• ఈ నిర్మాణం పూర్తయిన ఏడాదే హిమపాతం సంభవించింది. కానీ గ్రామం సురక్షితంగా ఉంది. హిమపాతం నుంచి ఆ నిర్మాణం కాపాడింది. ఈ ప్రాంతం ప్రశాంతమైన వాతావరణంతో పర్యాటకులను విశేషంగా ఆకర్షిస్తుంది. ఇక్కడి ప్రజల ప్రధాన వృత్తి చేపలు పట్టడం.