Queen Elizabeth: క్వీన్ ఎలిజబెత్-2కి గూగుల్ ప్రత్యేక నివాళి.. మీరు గమనించారా లేదా?

బ్రిటన్‌ను దీర్ఘకాలం పరిపాలించిన రాణి ఎలిజబెత్-II (Queen Elizabeth II) గత గురువారం కన్నుమూశారు. ఎలిజబెత్ మరణంపట్ల ప్రపంచవ్యాప్తంగా సంతాపం వ్యక్తమవుతోంది. దేశాధినేతలు, రాజకీయ, దౌత్య, క్రీడా, సినీ రంగాలకు చెందిన సెలబ్రెటీల నుంచి సాధారణ వ్యక్తుల వరకు చాలామంది తమతమ సంతాపాన్ని ఇప్పటికే ప్రకటించారు. ఈ జాబితాలో సెర్చింజన్ దిగ్గజం గూగుల్(Google) కూడా చేరింది.

సంతాప సూచకంగా గూగుల్(google) తన హోమ్ పేజీ రంగులను మార్చివేసింది. కలర్‌ఫుల్ లోగోని గ్రే కలర్‌లోకి మార్చింది. వైట్‌బ్యాక్ గ్రౌండ్‌లో  గ్రే కలర్‌‌తో లోగోని ప్రదర్శించింది. ఈ మార్పు ప్రపంచవ్యాప్తంగా కనిపిస్తోంది. అందులో భాగంగానే ఇండియాలో కూడా కనిపిస్తోంది. ఇప్పటికే భారతీయ యూజర్లు ఈ విషయాన్ని గుర్తించారు. అయితే అవగాహనలేని కొందరికి గూగుల్ హోం పేజీ రంగులు ఎందుకు మారాయో తెలియదు. మరోవైపు ఎలాంటి డూగుల్‌నీ గూగుల్ ప్రదర్శించలేదు. కాగా అంతకుముందు గూగుల్ మాతృసంస్థ అల్ఫాబెట్ సీఈవో సుందర్ పిచాయ్(Sunder pichaiah) ట్విటర్ వేదికగా రాణి ఎలిజబెత్-2 మరణం పట్ల సంతాపం ప్రకటించారు. యూకే ప్రజలకు ప్రగాఢ సంతాపం తెలియజేస్తున్నానని వ్యాఖ్యానించారు.

కాగా మరో టెక్ దిగ్గజం యాపిల్(Apple) తన హోం పేజీని మార్చింది. క్విన్ ఎలిజబెత్-2 చిన్నప్పటి ఫొటోతోపాటు స్మృతి సందేశాన్ని పంచుకుంది. ఈ మేరకు యాపిల్ వెబ్‌సైట్‌లో ఎలిజబెత్ ఫొటో కనిపిస్తోంది.