కంగన కేసులో హృతిక్‌కు ముంబై పోలీసుల సమన్లు!

Feb 26 2021 @ 15:17PM

బాలీవుడ్ ప్రముఖ కథానాయకుడు హృతిక్ రోషన్‌కు ముంబై పోలీసులు సమన్లు జారీ చేశారు. బాలీవుడ్ ఫైర్ బ్రాండ్ కంగనా రనౌత్ కేసులో శనివారం ఉదయం 11 గంటలకు ముంబై క్రైమ్ బ్రాంచ్ ఆఫీస్‌కు వచ్చి వాంగ్మూలం ఇవ్వాల్సిందిగా ఆదేశించారు. కంగన ఈ-మెయిల్ అకౌంట్ నుంచి తనకు బెదిరింపు మెయిల్స్ వచ్చాయని 2016లో హృతిక్ పోలీసులకు ఫిర్యాదు చేసిన విషయం తెలిసిందే.

సదరు ఈ-మెయిల్ ఐడీని హృతికే తనకు ఇచ్చాడని, ఆ మెయిల్ ద్వారానే తాము రెండేళ్ల పాటు ఛాటింగ్ చేసుకున్నామని కంగన వివరణ ఇచ్చింది. దీంతో 2016లోనే ఈ కేసు విచారణ నిమిత్తం హృతిక్ ల్యాప్‌టాప్, ఫోన్‌ను ముంబై సైబర్ సెల్ స్వాధీనం చేసుకుంది. కంగన స్టేట్‌మెంట్‌ను కూడా రికార్డు చేసింది. అయితే హృతిక్ విజ్ఞప్తి మేరకు ఈ కేసును గతేడాది డిసెంబర్‌లో ముంబై సైబర్ సెల్ నుంచి క్రిమినల్ ఇంటెలిజెన్స్ యూనిట్‌కు బదిలీ చేశారు. ప్రస్తుతం క్రిమినల్ ఇంటెలిజెన్స్ యూనిట్‌ ఈ కేసును విచారిస్తోంది.