Saudi Arabia: దేశంపై ప్రేమ.. సౌదీలో నిబంధనలు ఉల్లంఘించిన హైదరాబాదీ.. ఎట్టకేలకు..

ఎన్నారై డెస్క్: విదేశాల్లో నివసిస్తున్నా.. అతడికి దేశంపై చెప్పలేనంత ప్రేమ ఉంది. దీంతో నివసిస్తున్న చోటే దేశభక్తి చాటుకున్నాడు. ఈ క్రమంలో అతడికి పోలీసులు షాకిచ్చారు. నిబంధనలు ఉల్లంఘించావంటూ అతడిని జైల్లో వేశారు. అయితే.. ఎట్టకేలకు అతడు జైలు నుంచి విడుదలయ్యాడు. ఈ క్రమంలో అతడికి సంబంధించిన పూర్తి వివరాల్లోకి వెళితే..

హైదరాబాద్‌(Hyderabadi)కు చెందిన ఓ వ్యక్తి.. కొన్నేళ్ల క్రితమే సౌదీ అరేబియా(Saudi Arabia)లో స్థిరపడ్డారు. సౌదీలోని ప్రధాన నగరాల్లో ‘హైదరాబాద్ బిర్యానీ’ పేరుతో పలు రెస్టారెంట్‌లు నిర్వహిస్తున్నారు. తాజాగా భారత ప్రభుత్వం ఇచ్చిన ‘ఆజాదీ కా అమృత్ మహోత్సవ్’ పిలుపులో భాగంగా ఆగస్ట్ 15న రియాద్‌లోని తన రెస్టారెంట్‌లో స్వాతంత్ర్య వేడుకలు(Independence Day Celebrations) నిర్వహించారు. దీంతో అక్కడి పోలీసులు ఆయనను అరెస్టు చేశారు. ముందస్తు అనుమతులు తీసుకోకుండా వేడుకలు నిర్వహించడం, పెద్ద మొత్తంలో జన సమూహానికి కారణమైనందుకు జైలులో వేశారు. నిబంధనలు ఉల్లంఘించిన నేరం కింద దాదాపు 10 రోజులపాటు జైలు జీవితం గడిపిన హైదరాబాదీ తాజాగా విడుదలయ్యారు.