దేవుడితో మాట్లాడతా!: ‘ఆదిత్య 369’ హీరోయిన్ మోహిని

Aug 1 2021 @ 00:41AM

‘ఆదిత్య 369’, ‘డిటెక్టివ్‌ నారద’ వంటి సినిమాల్లో నటించి తెలుగు ప్రేక్షకులను అలరించిన మోహిని, స్వతహాగా శుద్ధ శ్రోత్రియ బ్రాహ్మణ కుటుంబంలో పుట్టి పెరిగినప్పటికీ ప్రస్తుతం ఆమె క్రైస్తవ మతాభిమాని. అంతే కాదు దేవుడితో మాట్లాడతానని కూడా అన్నారు. ఆ విషయాలేంటో ఆమె మాటల్లోనే..


ఆయనే ప్రజాపతి!

‘క్రీస్తు’ అంటే విదేశీ దేవుడు కాదు. సుమారు ఐదువేల సంవత్సరాల క్రితం నాటి ఋగ్వేదంలో ఏసుస్వామి గురించి ఉంది. అందుకే అనేక మంది పాస్టర్లు ఇప్పుడు ఋగ్వేదం చదువుతున్నారు. ఋగ్వేదం ప్రకారం- ఒక కన్యకు ప్రజాపతి అనే దైవదూత పుడతాడు. ఆయనను ఒక చెట్టుకు కట్టి, మూడు శీలలను ఉపయోగించి చంపుతారు. ఆ శీలల సైజు ఎంతో కూడా దానిలో ఉంది. ‘ప్రజాపతి’ అంటే మొదటి మగవాడు, కొడుకు, భర్త, సోదరుడు, అధిపతి.. ఇలా రకరకాల అర్థాలు తీసుకోవచ్చు. మొత్తం మీద ‘ప్రజాపతి’ అంటే ‘బ్రహ్మ మొదటి కుమారుడు’ అని అర్థం. ప్రతి యజ్ఞంలోను పుర్ణాహుతిని ప్రజాపతికే అర్పిస్తారు. బ్రాహ్మణులకు 12 గోత్రాలు ఉన్నట్లే.. క్రైస్తవంలో 12 తెగలు ఉన్నాయి. బ్రాహ్మణులు ప్రజాపతికి పూర్ణాహుతి ఇస్తారు. మురుగనకు ఇచ్చినా, నారాయణుడికి ఇచ్చినా, అమ్మవారికి ఇచ్చినా.. ఆ పూర్ణాహుతి వెళ్లేది ప్రజాపతికే. ఆ ప్రజాపతినే నేను విశ్వసిస్తున్నాను..’’


దేవుడితో మాట్లాడతా!

‘‘నేను క్యాథలిక్‌గా మారిన తర్వాత పేరును క్రిస్టియానాగా మార్చుకున్నా. నా జీవితమంతా కేథలిక్‌గా ఉండాలనే ఉద్దేశంతో పేరును మార్చుకున్నా. నేను క్రీస్తు పట్ల పరిపూర్ణమైన విశ్వాసంతో ఉన్నా. నేను ఆయనతో మాట్లాడతా. మనం చేసే ప్రార్థనలే మనల్ని ఆయనకు దగ్గరగా చేరుస్తాయి. నేను ఏ పనిచేయాలన్నా.. ఆయనకు చెప్పి, ప్రార్థన చేస్తా. అది పూర్తయ్యే సరికి ఒక ప్రశాంతమైన భావన కలుగుతుంది. అంటే ఆయన నా నిర్ణయాన్ని సమ్మతించినట్లు లెక్క. కొందరితో ఆయన నేరుగా కూడా మాట్లాడతారు. చాలా మంది ఇవి క్రైస్తవ మతంలోనే ఎందుకు ఉన్నాయని అడుగుతారు. హిందుమతంలో కూడా ఇవి ఉన్నాయి. కొందరు అమ్మవారు ఆవహించిందని పూనకం వచ్చినట్లు ఊగిపోతారు. అప్పుడు ఏవేవో చెబుతూ ఉంటారు. వాటిని నమ్ముతారు కదా.. ఇస్లాంలో కూడా ఇలాంటివి ఉన్నాయి. దేవుడు అందరితోనూ మాట్లాడతాడు. కానీ మనం గుర్తించలేం అంతే!

Follow Us on:
అంతర్జాలంలో ప్రకటనల కొరకు సంప్రదించండి
For internet advertisement and sales please contact
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.