365 days service: దుబాయ్లోని భారత కాన్సులేట్ తొలి వార్షికోత్సవం
ABN , First Publish Date - 2021-08-03T15:37:31+05:30 IST
ప్రవాసులకు అత్యావసర సేవలను మరింత చేరువ చేసేందుకు దుబాయ్లోని భారత కాన్సులేట్ గతేడాది ఆగస్టు 1న '365 డేస్ సర్వీస్' పేరిట కొత్త సర్వీసును తీసుకొచ్చింది.
దుబాయ్: ప్రవాసులకు అత్యావసర సేవలను మరింత చేరువ చేసేందుకు దుబాయ్లోని భారత కాన్సులేట్ గతేడాది ఆగస్టు 1న '365 డేస్ సర్వీస్' పేరిట కొత్త సర్వీసును తీసుకొచ్చింది. ఆగస్టు 1తో ఈ సేవలకు ఏడాది పూర్తైన సందర్భంగా ఆదివారం కాన్సులేట్ జనరల్ ఆఫ్ ఇండియా తొలి వార్షికోత్సవం నిర్వహించింది. ఏడాది పొడువునా, వారంలో ఏడు రోజులు, రోజుకు 24 గంటలు '365 డేస్ సర్వీస్' ద్వారా సేవలు అందించింది. వీకెండ్స్, సెలవు రోజుల్లో కూడా ఈ సర్వీస్ కొనసాగింది. 2020, ఆగస్టు 1న దుబాయ్కు కాన్సుల్ జనరల్ ఆఫ్ ఇండియా డా. అమన్ పూరి ఈ కార్యక్రమాన్ని ప్రారంభించారు.
దుబాయ్లోని భారత సమాజానికి 24/7 అత్యావసర సేవలు అందుబాటులో ఉంచాలనే ఉద్దేశంతో ఈ '365 డేస్ సర్వీస్'కు శ్రీకారం చుట్టారు. ముఖ్యంగా వీకెండ్స్, హాలీడేస్లో కూడా ప్రవాసులకు ఎమర్జెన్సీ సర్వీసులు అందించడం జరిగిందని ఈ సందర్భంగా అమన్ పూరి అన్నారు. వీకెండ్స్, సెలవు రోజుల్లో కాన్సులేట్ కార్యాలయాన్ని అత్యావసర సేవల కోసం ఉదయం 8 గంటల నుంచి 10 గంటల వరకు తెరిచి ఉంచుతున్నట్లు ఆయన పేర్కొన్నారు. రాబోయే రోజుల్లో ఈ సర్వీసును ట్రావెల్ ధృవపత్రాల(పాస్పోర్టు, ఎమర్జెన్సీ సర్టిఫికేట్స్, వీసాలు, ఇతర సేవలు) జారీ విషయంలో తలెత్తే సమస్యల పరిష్కారం కోసం విస్తరించునున్నట్లు తెలిపారు.