జీలకర్ర నీళ్లు మహా అద్భుతం.. బోలెడన్ని ఆరోగ్య ప్రయోజనాలు పొందాలంటే ఇలా చేయండి..

Published: Tue, 28 Dec 2021 11:11:23 ISTfb-iconwhatsapp-icontwitter-icon
జీలకర్ర నీళ్లు మహా అద్భుతం.. బోలెడన్ని ఆరోగ్య ప్రయోజనాలు పొందాలంటే ఇలా చేయండి..

ఆంధ్రజ్యోతి(28-12-2021)

ఏ కూరలోకైనా జీలకర్ర పడితే ఆ రుచే వేరు. మంచి సువాసనతో పాటు జీర్ణశక్తిని పెంచే శక్తి ఈ దినుసు సొంతం. అయితే మనం ఎప్పుడూ జీలకర్రను వంటలతోనే సరిపెట్టేస్తాం. ఈ మోతాదు మాత్రమే సరిపోదు. దీనిని పలు రకాలుగా వాడితే.. బోలెడన్ని ఆరోగ్య ప్రయోజనాలు లభిస్తాయి. అందులో జీలకర్ర నీళ్లు మహా అద్భుతం.. లాభాలెన్నో...


జీర్ణశక్తి- పిండి పదార్థాలు, గ్లూకోజ్‌, కొవ్వులు తేలికగా విడిపోయి.. జీర్ణమయ్యేందుకు తోడ్పడే ఎంజైమ్‌లు తయారయ్యేలా చేస్తాయి జీలకర్ర నీళ్లు. శరీరం శక్తిని ఖర్చు చేసే ప్రక్రియ వేగాన్ని పెంచి.. డయేరియా, వాంతులు లాంటి జీర్ణ సంబంధ రుగ్మతలను తొలగిస్తాయి కూడా.


విషాలు- శరీరం నుంచి విషతుల్య పదార్థాలను బయటకు వెళ్లగొట్టడంలో సమర్థమైనవి జీలకర్ర నీళ్లు. ఫలితంగా కాలేయం పనితీరు మెరుగుపడి జీర్ణశక్తి పెరుగుతుంది. ఫలితంగా అంతర్గత అవయవాల ఆరోగ్యం భేషుగ్గా ఉంటుంది.


వ్యాధినిరోధక శక్తి- జీలకర్రలోని యాంటీ ఆక్సిడెంట్లు వ్యాధి నిరోధక శక్తిని పెంచుతాయి. ఒక కప్పు జీలకర్ర నీటిలో ఒక రోజుకు అవసరమైన ఐరన్‌లో 7 శాతం లభిస్తుంది. ఈ నీటిలోని ఎ, సి విటమిన్లు వ్యాధికారక ఇన్‌ఫెక్షన్ల నుంచి శరీరానికి రక్షణ కల్పిస్తాయి. 


రక్తహీనత- ఈ నీటిలోని అధిక ఐరన్‌ వల్ల రక్తహీనత తొలగిపోతుంది. రక్తంలో తగినంత ఐరన్‌ లేకపోతే అవసరమైనన్ని ఎర్ర రక్త కణాలు తయారు కావు. ఫలితంగా నీరసం, నిస్సత్తువ ఆవహిస్తుంది. ఈ లోపాన్ని జీలకర్ర నీటితో భర్తీ చేయవచ్చు. 


శ్వాసకోశ వ్యవస్థ- కఫాన్ని కరిగించే గుణం జీలకర్రకు ఉంది. ప్రతి రోజూ ఉదయం జీలకర్ర నీరు తాగితే ఛాతీలో పేరుకున్న కఫం కరిగి బయటకు వచ్చేస్తుంది. దీనిలోని వ్యాధి నిరోధక గుణాలు బ్యాక్టీరియాను చంపి జలుబు, దగ్గు నుంచి ఉపశమనం కలిగిస్తాయి. 


నిద్ర- త్వరగా నిద్రలోకి జారుకునేలా చేయడంతో పాటు, గాఢమైన నిద్ర పట్టేందుకు ఈ నీళ్లు తోడ్పడతాయి.


జ్ఞాపకశక్తి- మెదడు పనితీరు మెరుగుపరిచి, జ్ఞాపకశక్తి పెరిగేలా చేయడంతో పాటు, ఏకాగ్రతనూ పెంచుతాయివి.


చర్మం- జీలకర్ర నీటితో శరీరంలోని విషాలు హరిస్తాయి. ఫలితంగా చర్మం మచ్చలు లేకుండా తాజాదనాన్ని సంతరించుకుంటుంది. సహజసిద్ధమైన మెరుపు సొంతమవుతుంది.


కొవ్వు- జీలకర్రలో ఉండే పైటోస్టిరాల్‌, సెపోనిన్‌ అనే మూలకాలు కొలెస్ర్టాల్‌ శోషణను నిరోధిస్తాయి. ఫలితంగా శరీరంలో కొవ్వు పేరుకునే ప్రక్రియ తగ్గుతుంది.


తయారీ ఇలా: ఒక కప్పు నీళ్లలో ఒక చెంచా జీలకర్ర వేసి మరిగించాలి. తర్వాత వడపోసి వేడిగా తాగాలి. ఈ పానీయం ఎన్నో రకాల చర్మ, శిరోజ సంబంధ సమస్యలను తొలగిస్తుంది. పరగడుపునే ఈ పానీయం తాగితే ఫలితం ఉంటుంది.


మరికొన్ని పద్ధతుల్లో... 


జీలకర్ర నీళ్లను నేరుగా తాగలేని వాళ్లు, కొంత అదనపు రుచులు జోడించి కూడా తీసుకోవచ్చు.


నిమ్మరసం- రెండు చెంచాల జీలకర్రను ఒక కప్పు నీటిలో వేసి, రాత్రంతా నానబెట్టాలి. ఉదయాన్నే ఆ నీటిని వడగట్టి, అరచెక్క నిమ్మరసం పిండుకుని తాగాలి. 


దాల్చిన చెక్క- రెండు చెంచాల జీలకర్రను రాత్రంతా నీళ్లలో నానబెట్టి ఉదయాన్నే వడగట్టాలి. దీనిలో చెరొక చెంచా దాల్చిన చెక్క పొడి, సోంపు పొడి కలిపి తాగాలి. 


యాపిల్‌ సిడార్‌ వెనిగర్‌- రెండు చెంచాల జీలకర్రను నీళ్లలో కలిపి రాత్రంతా నానబెట్టాలి. ఉదయాన్నే వడగట్టి చెంచా యాపిల్‌ సిడార్‌ వెనిగర్‌ కలిపి తాగాలి.


పెరుగు- ఒక చెంచా జీలకర్ర పొడి, అరకప్పు పెరుగు, ఒక చెంచా నిమ్మరసం, చిటికెడు ఉప్పు కలిపి మిక్సీలో వేసి తిప్పి తినాలి. 

Follow Us on:
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International

ప్రత్యేకంLatest News in Teluguమరిన్ని...

Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.