సలసలా మరుగుతున్న నూనెలో చేతిని ముంచి చికెన్ పీస్‌లు తీస్తున్నాడు.. నివ్వెరపోతున్న జనాలు..

వేడి వేడి నూనె మీద పడితే మంటతో విలవిలలాడిపోతాం. అలాంటిది సలసలా మరుగుతున్న నూనెలో చేయి పెడితే ఎలా ఉంటుంది? చర్మం ఊడి వచ్చేస్తుంది. అయితే ఓ వ్యక్తి సలసలా మరుగుతున్న నూనెలో చేతిని ముంచి చులాగ్గా చికెన్ పీస్‌లు తీసేస్తున్నాడు. నవ్వుతూ సంతోషంగా ఆ పని చేస్తున్నాడు. అతడిని చూసిన వారందరూ ఆశ్చర్యంతో నోరు వెళ్లబెడుతున్నారు. ఈ వీడియో ప్రస్తుతం సోషల్ మీడియాలో వైరల్ అవుతోంది. 

ఈ వీడియో ఇప్పటికి 13 లక్షలకు పైగా వ్యూస్ దక్కించుకుంది. 41 వేలకు పైగా లైక్స్ సాధించింది. ఆ వ్యక్తి ఏదో ట్రిక్ ఉపయోగించి అలా చేస్తున్నాడని కొందరు కామెంట్లు చేస్తున్నారు. `చికెన్‌తో పాటు అతడి చర్మం కూడా రుచి చూడాలనుకుంటే అక్కడికి వెళ్లి తినొచ్చ`ని ఓ వ్యక్తి కామెంట్ చేశారు. చేతులు కాలకుండా ఉండేందుకు ఆ వ్యక్తి ఏదో రసాయనం రాసుకున్నాడని, అది నూనెలో కలిసి తినే వారి శరీరంలోకి ప్రవేశిస్తుందని ఓ వ్యక్తి హెచ్చరించాడు. ఏదేమైనా ఈ వీడియో చూసేవారిని షాక్‌కు గురి చేస్తోంది.