పెళ్లి తర్వాత జీవితం ఊహించినట్టుగా లేదని.. షాకింగ్ నిర్ణయం తీసుకున్న యువతి!

పెళ్లి తర్వాత జీవితం రంగుల కలలా ఉంటుందని ఆశలు పెట్టుకుంది.. తీరా పెళ్లయ్యాక ఆమె కలలు కల్లలుగానే మిగిలాయి.. భర్తతో నిత్యం గొడవలే.. ఈ గొడవలు రానురానూ ముదరడంతో ఆమె షాకింగ్ నిర్ణయం తీసుకుంది.. జీవితం మీద అసంతృప్తితో ఆత్మహత్య చేసుకుంది.. కర్ణాటకలోని మైసూరులో ఈ ఘటన బుధవారం జరిగింది. 

మైసూరులోని హున్సూర్ తాలూకాకు చెందిన పల్లవి అనే యువతికి ఏడాది క్రితం వివాహమైంది. కొన్నాళ్లు పాటు ఆమె కాపురం సంతోషంగానే సాగింది. అయితే ఆరు నెలల తర్వాత ఆ కాపురంలో కలతలు రేగాయి. ఈ గొడవలు రానురానూ పెరిగిపోవడంతో భార్యాభర్తలిద్దరూ శత్రువుల్లా మారిపోయారు. ఈ గొడవల కారణంగా పల్లవి కొన్నాళ్లు పుట్టింటికి వెళ్లిపోయింది. అయితే.. ఇరు కుటుంబాల పెద్దలూ రాజీ కుదర్చి ఇద్దరినీ కలిపారు. అయితే ఆ ముచ్చట ఎంతోకాల సాగలేదు. 

మళ్లీ ఇద్దరి మధ్య విభేదాలు మొదలయ్యాయి. ఒకరిపై ఒకరు దాడి చేసుకునే వరకూ వెళ్లారు. పెళ్లి తర్వాత జీవితం తను ఊహించినట్టుగా లేదని, భర్త తనను వేధిస్తున్నాడని స్నేహితులతో చెప్పుకుని పల్లవి బాధపడుతుండేది. కాగా, గత మంగళవారం ఈ ఇద్దరి మధ్య మరోసారి గొడవ జరిగింది. పల్లవితో తీవ్రంగా గొడవపడిన భర్త ఇంటి నుంచి బయటకు వెళ్లిపోయాడు. అతడు తిరిగి వచ్చేసరికి పల్లవి ఇంట్లో ఉరేసుకుని చనిపోయింది. ఈ ఘటన గురించి సమాచారం అందుకున్న పోలీసులు పల్లవి మృతదేహాన్ని పోస్ట్‌మార్టం నిమిత్తం ఆసుపత్రికి తరలించారు. పల్లవి కుటుంబ సభ్యుల ఫిర్యాదు మేరకు ఆమె భర్తపై కేసు నమోదు చేసి అదుపులోకి తీసుకున్నారు.