ఇలా జరగాలంటే మరో వెయ్యేళ్లు ఆగాల్సిందే..

అంకెల అద్భుతాలు ఒక్కో సందర్భంలో సరదాగా ఉంటాయి. ఒక్కోసారి మనం ఎంత దూరం వచ్చామో చెప్తే.. మరోసారి మళ్లీ చూడలేని రోజులను గుర్తుచేసి మనలోని వైరాగ్య భావాలను నిద్రలేపుతాయి. ఈరోజు అంటే ఫిబ్రవరి 2, 2020 కూడా అలాంటిదే. ఎందుకంటే ఈ తేదీ ఓ ఎనిమిదంకెల పాలిండ్రోమ్ సంఖ్య. అంటే ముందు నుంచి చదివినా, వెనక నుంచి చదివినా ఒకేలా ఉండే సంఖ్య అన్నమాట. ఈరోజు తేదీ.. 02-02-2020ను ఎటునుంచి చదివినా ఒకేలా ఉంటుంది.

అంతేకాదండోయ్ ఈ తేదీ క్రాస్ కల్చరల్ కూడా. అంటే పాశ్చాత్యులు, ఇతరులు తేదీ రాసేటప్పుడు వేరే వేరు విధానాలను పాటిస్తారు. అంటే తేదీలను రోజు, నెల, ఏడాది వచ్చేలా ఓ వర్గం రాస్తే.. నెల, రోజు, ఏడాది వచ్చేలా మరో వర్గం రాస్తుంది. ఈరోజు తేదీని ఎలా రాసినా అదే సంఖ్య వస్తుంది. ఇలాంటి వింత 909ఏళ్ల క్రితం ఓసారి జరిగింది. అప్పుడు 11-11-1111న ఇలాంటి పాలిండ్రోమ్ సంఖ్య తేదీగా వచ్చింది. మళ్లీ ఇలాంటి వింతను మన జీవితాల్లో చూడలేం. ఎందుకంటే మరోసారి ఇలాంటి పాలిండ్రోమ్ తేదీ రావాలంటే దాదాపు 1000ఏళ్లు వేచిచూడాలి మరి.