6ఏళ్ల చిన్నారి గీసిన స్కెచ్‌తో పోలీసుల ఇన్వెస్టిగేషన్
ABN , First Publish Date - 2020-11-15T03:48:10+05:30 IST
ఏదైనా కేసును ఇన్వెస్టిగేషన్ చేసేటప్పుడు పోలీసులు దానికి సంబంధించిన ఊహాచిత్రాలను వినియోగించడం మామూలే. దానికోసం నిపుణులైన ఆర్టిస్ట్‌లతో...
బెర్లిన్: ఏదైనా కేసును ఇన్వెస్టిగేషన్ చేసేటప్పుడు పోలీసులు దానికి సంబంధించిన ఊహాచిత్రాలను వినియోగించడం మామూలే. దానికోసం నిపుణులైన ఆర్టిస్ట్‌లతో డ్రాయింగ్ వేయిస్తుంటారు. జర్మనీలోని హమ్ నగర పోలీసులు కూడా ఓ మహిళా డ్రైవర్‌ను పట్టుకునేందుకు ఇలాంటి స్కెచ్‌లనే వాడుతున్నారు. అయితే ఆ స్కెచ్‌లు ఏదో ప్రొఫెషనల్ గీసినవి కాదు. ఓ 6ఏళ్ల బాలుడు గీసినవి. అంతేకాదు.. ఆ చిన్నారి గీసిన చిత్రాలు కేసులో కీలక భాగమేనంటూ చెబుతున్నారు. ఈ విషయాన్ని పోలీసులే స్వయంగా తమ ట్విటర్ ఖాతా ద్వారా వెల్లడించారు.
తమకు ఆ చిన్నారి గీసిచ్చిన చిత్రాలను తమ ట్వీట్‌కు జత చేశారు. ‘ఓ మహిళా డ్రైవర్ కావాలని రోడ్డు పక్కన ఉండే బ్యారియర్‌లను గుద్దేసి వెళ్లిపోయింది. ఆమెను పట్టుకునేందుకు మేము ప్రయత్నిస్తున్నాం. అందుకే ఈ స్కెచ్‌లను కూడా వినియోగిస్తున్నాం. ఇవి ఆ సంఘటనను చూసిన ఓ 6ఏళ్ల బాలుడు గీసిన చిత్రాలు’ అంటూ పోలీసులు తమ ట్వీట్‌లో పేర్కొన్నారు.
