తాళ్లతో చెట్లకు రక్షణ!

మొక్కలకు రక్షణగా ట్రీగార్డ్‌లు పెట్టడం చూస్తుంటాం. కానీ జపాన్‌లో ఏకంగా చెట్లకు రక్షణగా తాళ్లను ఏర్పాటు చేస్తారు. ఎందుకో తెలుసా? 

జపాన్‌లో చలికాలంలో మంచు కురుస్తుంది. చెట్ల కొమ్మలపై మంచు పేరుకుపోతే ఆ బరువుకి కొమ్మలు విరిగిపోతాయి. కొన్నేళ్లుగా ఈ మంచువల్ల చాలా చెట్లు విరిగిపోయాయి. 

ఆ చెట్లను కాపాడుకోవడం కోసం అక్కడి అధికారులు ఒక వినూత్న ప్రయోగం చేశారు. చెట్టు మధ్యలో కర్రను పాతి దాని చుట్టూ తాళ్లను శంఖంలా కట్టి చూశారు. వాటిని స్నో సస్పెండర్స్‌ అని అంటారు. ఆ ప్రయోగం ఫలితం ఇవ్వడంతో అన్ని చెట్లకు తాళ్లను ఏర్పాటు చేశారు. 

ప్రస్తుతం ఆ చెట్లు పర్యాటకులకు కనువిందు చేస్తున్నాయి. రాత్రివేళ చెట్ల మధ్యలో ప్రత్యేక లైట్లు అమర్చడంతో అవి మరింత ఆకర్షణీయంగా కనిపిస్తుంటాయి. ఆ సుందరదృశ్యాన్ని చూడటానికి ప్రజలు పార్కులను సందర్శిస్తుంటారు.