Britain Parliament: క్వీన్ హాజరు కాకుండానే బ్రిటన్ పార్లమెంటు సమావేశాలు... 60 ఏళ్ళలో ఇదే తొలిసారి...

ABN , First Publish Date - 2022-05-10T22:26:50+05:30 IST

బ్రిటన్ రాజ్యాధినేత క్వీన్ ఎలిజబెత్-2 మంగళవారం రాజ్యాంగబద్ధంగా

Britain Parliament: క్వీన్ హాజరు కాకుండానే బ్రిటన్ పార్లమెంటు సమావేశాలు... 60 ఏళ్ళలో ఇదే తొలిసారి...

లండన్ : బ్రిటన్ రాజ్యాధినేత క్వీన్ ఎలిజబెత్-2 మంగళవారం రాజ్యాంగబద్ధంగా జరిగే పార్లమెంటు సమావేశాల ప్రారంభ కార్యక్రమానికి హాజరుకాబోరని బకింగ్‌హామ్ ప్యాలెస్ ప్రకటించింది. ఆమె 70 ఏళ్ళ పాలనా కాలంలో గర్భిణిగా ఉన్న 1959, 1963 సంవత్సరాల్లో మాత్రమే ఈ కార్యక్రమానికి హాజరు కాలేదు. ఆ తర్వాత ఈ కార్యక్రమానికి హాజరుకాకపోవడం ఇదే తొలిసారి. 


బకింగ్‌హామ్ ప్యాలెస్ (Buckingham Palace) సోమవారం పొద్దుపోయాక విడుదల చేసిన ప్రకటనలో, క్వీన్ ఎలిజబెత్-2 (Queen Elizabet-II) మంగళవారం ప్రారంభమయ్యే పార్లమెంటు సమావేశాలకు హాజరు కాబోరని తెలిపింది. ఆమె ఎపిసోడిక్ మొబిలిటీ ప్రాబ్లమ్స్ (తీవ్ర అనారోగ్యం)తో బాధపడుతుండటంతో వైద్యుల సలహా మేరకు అయిష్టంగానే ఈ నిర్ణయం తీసుకున్నట్లు తెలిపింది. 


ప్రతి సంవత్సరం పార్లమెంటు సమావేశాల ప్రారంభం సందర్భంగా క్వీన్ ఎలిజబెత్ తన ప్రభుత్వ కార్యక్రమాలను వివరిస్తారు. ఈ రాజ్యాంగపరమైన కార్యక్రమాన్ని ఆమె నేతృత్వంలో నిర్వహిస్తారు. హౌస్ ఆఫ్ లార్డ్స్‌లో అద్భుతంగా అలంకరించిన సింహాసనంపై నుంచి ఆమె ప్రసంగిస్తారు. ప్రస్తుతం ఆమె వయసు 96 సంవత్సరాలు. 


క్వీన్ ఎలిజబెత్-2  పరిపాలనా కాలం దాదాపు 70 ఏళ్ళు. ఇది ఓ రికార్డు. ప్రస్తుతం ఆమె వృద్ధాప్యం, అనారోగ్యంతో బాధపడుతున్నారు. నిల్చోవడం, నడవడం కష్టంగా మారింది. ఇటీవల ఆమె బహిరంగంగా కనిపించడం లేదు. హై ప్రొఫైల్ కార్యక్రమాలను రద్దు చేసుకున్నారు. దీంతో ఆమె పరిపాలనా శకం అంత్య దశలో ఉన్నట్లు అందరూ భావిస్తున్నారు. 


1959, 1963 సంవత్సరాల్లో కూడా ఆమె గర్భధారణ వల్ల పార్లమెంటు సమావేశాల ప్రారంభ కార్యక్రమాలకు హాజరుకాలేకపోయారు. అప్పట్లో ఆమె ప్రిన్స్ ఆండ్రూ, ప్రిన్స్  ఎడ్వర్డ్‌లకు జన్మనిచ్చారు. 


మంగళవారం పార్లమెంటు సమావేశాల ప్రారంభ కార్యక్రమానికి ప్రిన్స్ ఛార్లెస్ (73) హాజరవుతారు. ఆయన క్వీన్ ధరించే ఇంపీరియల్ స్టేట్ క్రౌన్‌ను ధరించరు. అయితే దానిని ఆయన, ప్రిన్స్ విలియం తమ కారులో పార్లమెంటుకు తీసుకొస్తారు. క్వీన్ ప్రసంగించడానికి కూర్చునే సింహాసనం పార్లమెంటు అప్పర్ చాంబర్‌లో ఉంటుంది. దీనిని ఖాళీగా ఉంచుతారు. 


ప్రిన్స్ ఛార్లెస్ (Prince Charles) బ్రిటిష్ రాజ వంశ చరిత్రలో సుదీర్ఘకాలం వారసునిగా కొనసాగిన ఘనత దక్కించుకున్నారు. ఆయన ఏదో ఓ రోజు కింగ్ బాధ్యతలు స్వీకరిస్తారని, ఆ కర్తవ్యాలను నిర్వహించడానికి ఆయన మరింత చేరువయ్యారని బ్రిటిష్ మీడియా పేర్కొంది. విలియం పార్లమెంటు స్టేట్ ఓపెనింగ్‌కు హాజరవుతుండటం ఇదే తొలిసారి అని, ఎలిజబెత్, ఛార్లెస్‌‌లకు అతీతంగా ఆ కుటుంబం భవిష్యత్తు కోసం సిద్ధమవుతుండటానికి ఇది మరొక సుస్పష్టమైన సంకేతమని పేర్కొంది. 


క్వీన్ మార్చి 29న తన భర్త సంస్మరణ కార్యక్రమానికి హాజరయ్యారు. ఈ ఏడాది వేసవిలో జరిగే రాయల్ గార్డెన్ పార్టీలకు తాను హాజరుకాబోనని గత వారం ఆమె ప్రకటించారు. 


Read more