ఖరీఫ్‌ సాగుకు పెద్దేరు కుడి కాలువ నీరు

ఇరిగేషన్‌ డీఈ బాలసూర్యం

రావికమతం, జూలై 24: పెద్దేరు జలాశయం నుంచి కుడి ప్రధాన కాలువ ద్వారా ఖరీఫ్‌కు సాగునీరు అందిస్తామని నీటిపారుదల శాఖ డీఈ వి.బాలసూర్యం తెలిపారు. మేడివాడ పెద్దచెరువు వద్ద జరుగుతున్న పూడికతీత పనులను శనివారం పరిశీలించారు. ఈ సందర్భంగా ఆయన మాట్లాడుతూ, రెండేళ్లుగా కుడి కాలువ నుంచి ఆయకట్టుకు రిజర్వాయర్‌ నీరు అందలేదన్న రైతుల విజ్ఞప్తి మేరకు రూ.28 లక్షలతో పనులు పనులు చేపడుతున్నామని చెప్పారు. ఈ నిధులతో కుడి ప్రధాన కాలువ డ్యామ్‌ నుంచి మేడివాడ పెద్దచెరువు వరకు 19 కిలోమీటర్లు, మేడివాడ పెద్ద చెరువు నుంచి బుచ్చియ్యపేట చిన్నాలు చెరువు వరకు ఏడు కిలోమీటర్లు, చిన్నాలు చెరువు నుంచి మరో ఐదు కిలోమీటర్లు కాలువను అభివృద్ధి చేస్తామని ఆయన చెప్పారు. ఈ పనులు పూర్తయితే కుడి కాలువ కింద ఉన్న ఆయకట్టు భూములకు జలాశయం ద్వారాసాగునీటికి ఎటువంటి అవరోధాలు ఉండన్నారు. పనుల్లో ఏమైనా లోపాలు ఉన్నా, రైతులకు ఇబ్బందులు తలెత్తినా కాంట్రాక్టర్‌కు బిల్లు చెల్లించేది లేదని డీఈ స్పష్టం చేశారు. కార్యక్రమంలో ఏఈలు భాగ్యలక్ష్మి, మల్లేశ్వరి, క్వాలిటీ కంట్రోల్‌ ఏఈలు విశ్వశాంతి, పైడితల్లిబాబు పాల్గొన్నారు.