ltrScrptTheme3

అడవితల్లి ఒడిలో ఆర్కే

Oct 19 2021 @ 00:12AM

అడవి తల్లి ఒడి 

అమ్మై లాలించినాదా

ఆకులు రాల్చిన నీళ్లు 

జీవగంజయ్యినాయా

చుట్టూ ఇనుపకంచె

పక్కన జనసేన

పక్షుల జోహార్లు

ప్రకృతి రాల్చే పూలు

దండాలు ఆర్కే నీకు ఎర్రెర్ర దండాలు

‍ఆకాశమెర్రబారి 

కప్పేన జెండాలు


కటిక చీకటిలోనా

మెరిసే తారల గుంపు

నిండూ అమాసపైనా

పండు వెన్నెల పోరూ

గుంటనక్కల వేట

పైడికంటెల పాట

గాలి పలికే హోరు

ఘనమైన జోహారు

దండాలు ఆర్కే నీకు ఎర్రెర్ర దండాలు

‍ఆకాశమెర్రబారి 

కప్పేన జెండాలు


కళ్లల్ల ఎర్రజీర

భళ్లున తెల్లారినాదా

కన్నీటి ధార కదిలి

కర్తవ్యం గీసినాదా

కొలువుదీరిన చెట్లు

బారులు దీరిఉండ

కొండలెనుక పొద్దు

ఎరుపెక్కి గుంకిపాయె

దండాలు ఆర్కే నీకు ఎర్రెర్ర దండాలు

‍ఆకాశమెర్రబారి 

కప్పేన జెండాలు


కాపాడిన అడవితల్లి

వీడ్కోలు పలికినాదా

జింక లేళ్లు వగిసి

పరుగు మానినాయా

అమ్ము విల్లమ్ములన్నీ

అవనతమైనాయా

అదునుజూసి అడవి

కదనమయ్యినట్లు

అమరుడయ్యి ఆర్కే 

సమరమైనాడా

త్యాగంతో నింగీ నేలను సింగిడై కల్పినాడా

మిత్ర

(శాంతి చర్చల సహచరుడు, మావోయిస్టు పార్టీ నాయకుడు ఆర్కే స్మృతిలో...)

Follow Us on:
అంతర్జాలంలో ప్రకటనల కొరకు సంప్రదించండి
For internet advertisement and sales please contact
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.