రూ.60,000 కోట్లు అదానీ భూరి విరాళం

60వ వసంతంలోకి అడుగుపెడుతున్న సందర్భంగా ప్రకటించిన ఆసియా కుబేరుడు

అదానీ ఫౌండేషన్‌ ఆధ్వర్యంలో సేవా కార్యక్రమాలు 

ఆరోగ్య సంరక్షణ, విద్య, నైపుణ్య శిక్షణ కోసం విరాళ నిధులు వెచ్చించనున్న ఫౌండేషన్‌ 

న్యూఢిల్లీ: భారత కుబేరుడు గౌతమ్‌ అదానీ శుక్రవారం 60వ వసంతంలోకి అడుగుపెడుతున్నారు. ఈ సందర్భంగా ఆయనో భారీ నిర్ణయం తీసుకున్నారు. సామాజిక సేవా కార్యక్రమాల కోసం అదానీ, ఆయన కుటుంబం రూ.60,000 కోట్ల భూరీ విరాళాన్ని ప్రకటించింది. అదానీ ఫౌండేషన్‌ ఈ విరాళాన్ని  నిర్వహించనుందని, ప్రధానంగా ఆరోగ్య సంరక్షణ, విద్య, వృత్తి నైపుణ్య శిక్షణ కోసం ఈ నిధులను వెచ్చించనుందని గురువారం గౌతమ్‌ అదానీ వెల్లడించారు. భారత కార్పొరేట్‌ రంగ చరిత్రలో సామాజిక సేవా కార్యక్రమాల కోసం ప్రకటించిన అతిపెద్ద విరాళాల్లో ఇదొకటి. ఈ విరాళ మొత్తం అదానీ సంపదలో 8 శాతం కంటే అధికం. ఈ విరాళం ప్రకటన ద్వారా అదానీ కూడా బిల్‌గేట్స్‌, మార్క్‌ జుకెర్‌బర్గ్‌, వారెన్‌ బఫెట్‌, అజీమ్‌ ప్రేమ్‌జీ, అనిల్‌ అగర్వాల్‌ వంటి కుబేర దాతల జాబితాలోకి చేరారు. బ్లూంబర్గ్‌ బిలియనీర్స్‌ ఇండెక్స్‌ ప్రకారం.. ఈ నెల 23 నాటికి అదానీ కుటుంబం సంపద 9,170 కోట్ల డాలర్లుగా ఉంది. ప్రస్తుత మారకం రేటు ప్రకారం మన కరెన్సీలో రూ.7.15 లక్షల కోట్ల పైమాటే. అదానీ గ్రూప్‌ కంపెనీల షేర్లు భారీగా ర్యాలీ తీయడంతో ఈ ఏడాదిలో ఇప్పటివరకు ఆయన కుటుంబం ఆస్తి 1,520 కోట్ల డాలర్లకు పైగా పెరిగింది. ఈ ఏడాదిలో అత్యధిక సంపద వృద్ధిని నమోదు చేసుకున్న ప్రపంచ కుబేరుల్లో అదానీదే అగ్రస్థానం. ప్రపంచ సంపన్నుల్లో ప్రస్తుతం 8వ స్థానంలో ఉన్న అదానీ.. భారత్‌తోపాటు ఆసియా మొత్తానికీ నం.1 ధనవంతుడిగా కొనసాగుతున్నారు.