భారత్‌కు బాసటగా అమెరికా టెక్ కంపెనీ!

న్యూఢిల్లీ: కరోనా మహమ్మారి భారత్‌లో విలయం సృష్టిస్తోంది. దీంతో కొవిడ్-19తో ఇండియా చేస్తున్న పోరాటానికి ప్రపంచ దేశాలు మద్దతు ఇస్తున్నాయి. వీటితోపాటు అంతర్జాతీయ సంస్థలు కూడా భారత్‌కు బాసటగా నిలుస్తున్నాయి. ఈ క్రమంలోనే అమెరికాకు చెందిన ప్రముఖ సాఫ్ట్‌వేర్ సంస్థ సేల్స్‌ఫోర్స్ ఇండియాకు వైద్య పరికరాలను పంపింది. ఆక్సిజన్ కాన్సంట్రేటర్లు, పల్స్ ఆక్సీమీటర్లతో కూడిన బోయింగ్ 787 విమానం ఢిల్లీలో ల్యాండ్ అయింది. ఈ విషయాన్ని సేల్స్‌ఫోర్స్ సంస్థ సీఈఓ మార్క్ బెనియోఫ్ ట్విట్టర్ ద్వారా వెల్లడించారు. ఆరోగ్య శాఖ, రెడ్ క్రాస్ ద్వారా ఈ పరికరాలను భారత్‌లోని పలు ప్రాంతాలకు తరలించనున్నట్టు చెప్పారు. అంతేకాకుండా అతి త్వరలోనే వైద్య పరికరాలతో కూడిన మరో విమానాన్ని ఇండియాకు పంపనున్నట్టు పేర్కొన్నారు. ఇదిలా ఉంటే.. గూగుల్, మైక్రోసాఫ్ట్ వంటి దిగ్గజ సంస్థలు భారీ మొత్తంలో వివరాళాలు అందించిన విషయం తెలిసిందే.