చంద్రబాబుపై కేసు పెట్టడమంటే సుప్రీం ఆదేశాలను ఉల్లంఘించడమే : కాల్వ

అమరావతి : సీఎం జగన్ తన వైఫల్యాలను కప్పి పుచ్చుకోడానికే టీడీపీ అధ్యక్షుడు చంద్రబాబుపై అక్రమ కేసు పెట్టారని టీడీపీ సీనియర్ నేత కాల్వ శ్రీనివాసులు మండిపడ్డారు. కొత్త వైరస్ నుంచి ప్రజలు తమ ప్రాణాలు కాపాడుకోవాలని అప్రమత్తం చేయడం చంద్రబాబు చేసిన తప్పా? అని ప్రశ్నించారు. రాష్ట్రంలో ప్రజలు పిట్టల్లా రాలిపోతున్నా, జగన్ పట్టించుకోవడం లేదని మండిపడ్డారు. టీడీపీ అధ్యక్షుడు చంద్రబాబుపై కేసులు పెట్టి, కరోనా సమాచారాన్ని కప్పిపుచ్చాలనుకుంటున్నారని, ఆయనపై కేసు పెట్టడం సుప్రీం ఆదేశాలను ఉల్లంఘించడమేనని పేర్కొన్నారు. కొత్త స్ట్రెయిన్ ఎన్-440కే వైరస్ కర్నూలు నుంచి వచ్చి ఇప్పుడు దేశమంతా వ్యాపిస్తోందని జాతీయ పత్రికలు, ఛానళ్లు ఘోషిస్తున్నాయని కాల్వ శ్రీనివాసులు పేర్కొన్నారు.