జిల్లేళ్లు మొలుస్తున్న దేశం

Published: Wed, 22 Jun 2022 04:45:20 ISTfb-iconwhatsapp-icontwitter-icon

తగలబడుతున్న దేశంపైన

సముద్రాన్ని పిచ్కారీ చేయండి

పిడికిలెత్తిన యువసత్తువ భుజాల మీదినుండి

నిరుద్యోగ కావళ్లు కిందికి దించేయండి

శాంతి కరువైన దేశంలో మొలచిన

విప్లవ వృక్షాలపైన బుల్‌డోజర్లు కాదు

వృత్తి జలాన్ని మంత్రించి చిలకరించండి

గన్‌కల్చర్ ఆలోచనల్ని పక్కకి తోసి

సంస్కారవారధికి రాళ్లెత్తండి

పాలకులారా! ఫలిత పండితులారా!

ఎన్ని తప్పటడుగులు వేశారో లెక్కించండి

దేశ సామూహిక స్వేదామృతంపై అమ్మకం బోర్డు

మీ దివాళా రాజనీతిపైన ఎగురుతున్న జెండా

సరిహద్దుల్ని దేశరక్షణ కోసం కాక

కేవలం మీ రాజకీయ చతురత కోసం

శత్రువుల అష్టదిగ్బంధనానికి గురిచేయకండి

యువతకి మార్గదర్శకత్వం మానేసి

వలపైన ఆశల గింజలు చల్లకండి

యువశక్తి పావురాల గుంపుకాదు

అది అణుశక్తి ప్రభంజనం

ఈ దేశానికి వెన్నెముక రైతన్న ఐతే

రైతన్న రెక్కల్లో కారుతున్న స్వేదం యువత

దేశ రక్షణని ఫణంగా పెట్టి

యువకుల భవితపై గొడ్డలిపెట్టు వేయకండి

మరవకండి–

మీ అగ్నిపథాల పథకాలు

ఆ కిరణాగ్ని సమిధల్ని ఆర్పలేవు!

ఈతకోట సుబ్బారావు 


Follow Us on:
ABN Youtube Channels ABN Indian Kitchen ABN Entertainment Bindass NewsBindass News ABN Something Special ABN Devotional ABN Spiritual Secrets ABN Telugu ABN Telangana ABN National ABN International
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.