టీ తాగడానికని పక్కింటికి వెళ్లిన మహిళను అట్నుంచి అటే జైపూర్ తీసుకెళ్లిపోయారు.. ఇంటికి తిరిగి వచ్చిన ఆమె చెప్పిందేంటంటే..

ఆమె టీ తాగడం కోసమని తమ పక్కింటికి వెళ్లింది.. అక్కడున్న నలుగురితో సరదాగా మాట్లాడుతూ టీ తాగింది.. ఆ తర్వాత ఆమెకు ఏం జరిగిందో తెలియలేదు.. కళ్లు తెరిచి చూసే సరికి జైపూర్‌లోని ఓ గదిలో ఉంది.. తనపై నలుగురు సామూహిక అత్యాచారానికి పాల్పడినట్టు తెలుసుకుంది.. తప్పించుకుని ఇంటికి వెళ్లి అక్కణ్నుంచి పోలీసులకు ఫిర్యాదు చేసింది.. రాజస్థాన్‌లోని అజ్మీర్‌లో ఈ ఘటన జరిగింది. 

అజ్మీర్‌కు సమీపంలోని రూప్‌నగర్ గ్రామానికి చెందిన బాధిత మహిళ గత శనివారం తమ పక్కింటికి వెళ్లింది. అక్కడ నేమిచంద్ అనే వ్యక్తి ఆమెకు టీ కలిపి ఇచ్చాడు. అప్పటికే ఆ టీలో మత్తు పదార్థం కలపడం వల్ల దానిని తాగిన మహిళ స్పృహ కోల్పోయింది. అపస్మారక స్థితిలోకి వెళ్లిన ఆమెను నేమిచంద్, రామ్‌స్వరూప్, హనుమాన్, గోపాల్ సింగ్ కారులో జైపూర్‌కు తీసుకెళ్లారు. అక్కడ ఆమెపై ఆ నలుగురు రోజంతా అత్యాచారానికి పాల్పడ్డారు. 

ఆదివారం ఆమెకు స్పృహ వచ్చాక కూడా ఆమెను బలాత్కరించారు. ఈ విషయం ఎవరికైనా చెబితే చంపేస్తామని బెదిరించారు. అక్కణ్నుంచి తప్పించుకుని రూప్‌నగర్ తిరిగి వెళ్లిన మహిళ స్థానిక పోలీస్ స్టేషన్‌లో ఫిర్యాదు చేసింది. తనపై జరిగిన సామూహిక అత్యాచారం గురించి చెప్పింది. కేసు నమోదు చేసుకున్న పోలీసులు నిందితుల కోసం గాలిస్తున్నారు.