ఎత్తుకెళ్లిన వ్యాక్సిన్లను తిరిగి ఇచ్చేసిన దొంగ!

దేశంలో కరోనా రెండో దశ తీవ్రంగా ఉన్న నేపథ్యంలో వ్యాక్సిన్లకు తీవ్ర డిమాండ్ ఏర్పడింది. తొలుత వ్యాక్సిన్లంటే విముఖత చూపిన ప్రజలు ప్రస్తుతం వాటి కోసం ఎగబడుతున్నారు. వ్యాక్సినేషన్ సెంటర్ల ముందు బారులు తీరుతున్నారు. ఈ నేపథ్యంలో హరియాణాలోని జింద్ జిల్లా ప్రభుత్వాసుపత్రిలో 1700 వ్యాక్సిన్లు చోరీకి గురి కావడం కలకలం సృష్టించింది. 

ఆ వ్యాక్సిన్లను సదరు దొంగ తాజాగా తిరిగి ఇచ్చేశాడు. జింద్‌లోని సివిల్ పోలీస్ స్టేషన్‌కు ఎదురుగా ఉన్న టీకొట్టులో ఉన్న వ్యక్తికి వ్యాక్సిన్లు ఉన్న పెట్టెను ఇచ్చేసి అక్కణ్నుంచి వెళ్లిపోయాడు. ఆ పెట్టెలో కోవాగ్జిన్, కోవిషీల్డ్ వ్యాక్సిన్లతోపాటు ఓ ఉత్తరం కూడా ఉంది. `క్షమించండి.. ఇవి కరోనా టీకాలు అని నాకు తెలియదు` అని ఆ ఉత్తరంలో రాశాడు. కరోనా చికిత్సకు ఉపయోగపడే `రెమిడెసివర్` ఇంజక్షన్లుగా భావించి వ్యాక్సిన్లను దొంగ ఎత్తుకెళ్లి ఉంటాడని పోలీసులు భావిస్తున్నారు.