వీడియో తీస్తుంటే.. ఎదురొచ్చిన పులి!

ఇంటర్నెట్ డెస్క్: ప్రకృతిలో ప్రతిజీవీ బిడ్డలకు చాలా ప్రాముఖ్యత ఇస్తుంది. తన పిల్లలతో ఉన్నప్పుడు వేరే జంతువులు దగ్గరగా వస్తే చాలు ఆగ్రహంతో ఊగిపోతాయి. దాడిచేయడానికి ముందుకు దూకుతాయి. అలాంటిది ఓ పులి మాత్రం అలా చేయలేదు. తన బిడ్డలతో తిరుగుతుండగా దగ్గరగా వచ్చిన ఓ కారును చూసి కూడా బెదరలేదు. దానిలో నుంచి ఈ పులి కుటుంబాన్ని వీడియో తీస్తుంటే చక్కగా అక్కడే నిలబడి వీడియో తీయించుకుంది. ఆ తర్వాత కారుకు ఎదురుగా వచ్చి నిలబడింది. ఈ ఘటన ఉత్తరప్రదేశ్‌లోని దుధ్వా టైగర్ రిజర్వులో వెలుగుచూసింది

దుధ్వా టైగర్ రిజర్వులో ఫీల్డ్ డైరెక్టర్‌గా ఓ వ్యక్తి పనిచేస్తున్నాడు. చీకటి పడిన తర్వాత రిజర్వు ఫారెస్టులో తనిఖీ చేస్తున్నాడు. ఆ సమయంలో ఓ పులి తన పిల్లలతో కలిసి ఉండటం గమనించాడు. వెంటనే వాహనాన్ని ఆపి ఆ పులికుటుంబాన్ని వీడియో తీయడం ప్రారంభించాడు. వాహనం హెడ్‌లైట్లు తనపై పడటంతో ఆ పులి కారువైపు చూసింది. పిల్లలతో ఉన్నప్పుడు ఇలాంటి జీవులు కోపంగా ప్రవర్తిస్తాయి. ఎవరైనా దగ్గరకొస్తుంటే వెంటనే దాడి చేస్తాయి. దీంతో ఆ పులి కూడా తన వాహనంపై దాడి చేస్తుందనే సదరు ఫీల్డ్ డైరెక్టర్ భావించాడు.

ఆ పులి మాత్రం ఫీల్డ్ డైరెక్టర్ ఊహలకు విరుద్ధంగా ప్రవర్తించింది. కాసేపు అక్కడే తచ్చట్లాడి కారువైపు వచ్చింది. దాంతోపాటే దాని పిల్లలు కూడా వచ్చాయి. కారుకు చాలా దగ్గర్లోకి వచ్చిన తర్వాత ఆ పులి కాసేపు అక్కడే ఆగింది. ఆ తర్వాత పక్కకు తిరిగి వెళ్లిపోయింది. ఆ సమయంలో పులిపిల్లలు కూడా బొమ్మల్లా కాసేపు ఆ వాహనం ముందు నిలబడి, ఆ తర్వాత తల్లిని అనుసరించాయి. ఈ వీడియోను ఇండియన్ ఫారెస్ట్ సర్వీస్ సీనియర్ ఆఫీసర్ రమేష్ పాండే ట్విట్టర్‌లో షేర్ చేశారు. ‘‘ఈ పులి, దాని పిల్లలను దుంధ్వా టైగర్ రిజర్వు ఫీల్డ్ డైరెక్టర్ అద్భుతంగా కెమెరాలో బంధించారు. దీన్ని కచ్చితంగా చూడాల్సిందే’’ అంటూ పోస్టు పెట్టారు.

ప్రస్తుతం ఈ వీడియో సోషల్ మీడియాలో వైరల్ అవుతోంది. దీన్ని చూసిన నెటిజన్లు ఫీల్డ్ డైరెక్టర్‌ అదృష్టాన్ని మెచ్చుకుంటున్నారు. అలాగే కారు, కారులో మనుషులు ఉన్నా కూడా ఆ పులి కొంచెం కూడా బెదరలేదని, చాలా కంఫర్ట్‌గా కనిపించిందని అంటున్నారు. పులిపిల్లలు కూడా ఎటువంటి భయాందోళనలు చూపించకపోవడం నిజంగా టైగర్ రిజర్వు ఉద్యోగుల ఘనతేనని కొనియాడారు. తమకేమీ కాదనే భరోసాతోనే ఆ పులి కుటుంబం ఇలా ప్రవర్తించిందని కొందరు కామెంట్లు చేస్తున్నారు. ఏది ఏమైనా ఇలాంటి అనుభవం జీవితంలో ఒక్కసారైనా వస్తే చాలంటూ ట్వీట్లు చేస్తున్నారు.