అందరూ ఉక్రెయిన్ నుంచి పారిపోతుంటే.. అమెరికా జాతీయుడేమో బాంబుల వర్షాన్ని లెక్క చేయకుండా..

ఎన్నారై డెస్క్: తండ్రి పదానికి అసలైన ప్రతిరూపం ఆ అమెరికన్. ఉక్రెయిన్‌లో చిక్కుకుపోయిన తన కూతురు, మనవరాలిని రక్షించేందుకు అతడు యుద్ధాన్ని సైతం లెక్క చేయకుండా ఉక్రెయిన్ వెళ్లాడు. అతడి సంకల్పానికి అదృష్టం కూడా తోడవడంతో చివరకు తన కుటుంబాన్ని సురక్షితంగా ఉక్రెయిన్ నుంచి బయటకు తెచ్చుకోగలిగాడు. ఎంతటి ధైర్యవంతులు కూడా ఊహించలేని ఈ సాహస యాత్ర చేసిన అతడి పేరు విలియమ్ హబ్బార్డ్!

విలియమ్ హబ్బార్డ్ మసాచుసెట్స్ రాష్ట్రంలో ఉంటారు. ఆయన కూతరు ఎయిస్లిన్ 2018లో బ్యాలే నృత్యం నేర్చుకునేందుకు ఉక్రెయిన్ వెళ్లింది. అక్కడ ఉండగానే ఆమెకు ఓ బాబు పుట్టాడు. అయితే.. అది కరోనా ఆంక్షలు అమల్లో ఉన్న సమయం. ఆమె బిడ్డ ఓ చిన్న ఇంట్లో పుట్టాడు. జనన ధృవీకరణ పత్రం, పాస్‌పోర్టు వంటివేవీ ఆ చిన్నారికి లేకపోవడం అతడిని తీసుకుని ఉక్రెయిన్ వీడటం ఆ తల్లికి సాధ్యపడలేదు. ఈ లోపే.. యుద్ధం మొదలైపోయింది. ఇలా ప్రమాదకర పరిస్థితుల్లో చిక్కుకుపోయిన తన కూతురు, మనవడిని రక్షించుకునేందుకు విలియమ్స్ ఇటీవల సాహస యాత్రకు బయలు దేరారు.

 మొదట పోలాండ్‌కు చేరుకుని ఆపై కాలినడకన సరిహద్దు దాటి ఉక్రెయిన్‌లోకి ప్రవేశించారు. ఆ తరువాత.. కూడా కాలినడకనే ప్రయాణిస్తూ కీవ్‌లోని తన కూతురు, మనవరాలిని కలసుకున్నారు. అనంతరం.. వాళ్లిద్దరినీ తీసుకుని తిరుగు ప్రయాణం ప్రారంభించిన ఆయన.. శుక్రవారం నాడు స్లోవేనియాలో  కాలు పెట్టారు. ఇంతటి ప్రమాదకరమైన నిర్ణయం ఎలా తీసుకోగలిగారు అని మీడియా వారు ప్రశ్నించగా.. ఏ తండ్రి అయినా ఇలాగే చేస్తాడు. తన కుటుంబాన్ని కాపాడుకుంటాడు’’ అంటూ విలియమ్స్ తడుముకోకుండా సమాధానం చెప్పారు.