బంతి కోసం రిస్క్ చేసిన యువకుడు!

వాషింగ్టన్: మొసలి.. ఈ పేరు వింటేనే చాలా మందికి ఒళ్లు జలదరిస్తుంది. అటువంటి మొసలి సమీస్తే.. ఎవ్వరైనా అక్కడి నుంచి పరుగులు తీయాల్సిందే. అయితే ఓ యువకుడు మాత్రం ధైర్యం చేసి మొసలి దగ్గరకు వెళ్లాడు. ప్రస్తుతం అందుకు సంబంధించిన వీడియో సోషల్ మీడియాలో హల్‌చల్ చేస్తోంది. వివరాల్లోకి వెళితే.. ఫ్లోరిడాకు చెందిన కైల్ డౌనెస్ అతని సోదరుడితో కలిసి కేప్ కోరల్‌లో సరదాగా గోల్ఫ్ ఆడుతున్నాడు. ఈ క్రమంలో కైల్ డౌనెస్ సోదరుడు బాల్‌ను బలంగా బాదడంతో అది కాస్తా.. నీటిలోంచి ఒడ్డుకు వచ్చిన మొసలి తోకపై పడింది. అయితే మొసలి దగ్గర పడిన బంతిని వదిలేయకుండా.. దాన్ని ఎలాగైనా తెచ్చుకోవాలని కైల్ డౌనెస్ నిర్ణయించకున్నాడు. ఈ క్రమంలో ధైర్యం చేసుకుని మెల్లిగా మొసలి దగ్గరకు వెళ్లాడు. అనంతరం తోకపై ఉన్న బంతిని చేతులోకి తీసుకుని పరుగు పెట్టాడు. ఈ నేపథ్యంలో ఒక్కసారిగా అలజడి కావడంతో మొసలి కూడా భయభ్రాంతులకు గురై నీటిలోకి జారుకుంది. ప్రస్తుతం ఇందుకు సంబంధించిన వీడియో సోషల్ మీడియాలో వైరల్‌గా మారింది. దీనిపట్ల స్పందిస్తున్న నెటిజన్లు.. బంతి కోసం అంత రిస్క్ చేయడం అవసరమా అంటూ కామెంట్ చేస్తున్నారు.