సీతారాముల కల్యాణానికి ముస్తాబైన రాజన్న క్షేత్రం

వేములవాడ: సీతారాముల కల్యాణోత్సవానికి రాజన్న సిరిసిల్ల జిల్లాలోని వేములవాడ క్షేత్రం ముస్తాబైంది. ఏటా శ్రీరామనవమి సందర్భంగా వేములవాడ రాజరాజేశ్వరస్వామివారి దేవస్థానంలో సీతారామచంద్ర స్వామివారి కల్యాణ వేడుకలను కన్నుల పండువగా నిర్వహించడం ఆనవాయితీగా వస్తోంది. శ్రీరామనవమి సందర్భంగా 10వ తేదీ ఆదివారం ఉదయం 11-55 గంటలకు  సీతారాముల కల్యాణోత్సవాన్ని నిర్వహించనున్నారు. ఆలయ అధికారులు 20 లక్షల అంచనా వ్యయంతో ఏర్పాట్లు చేశారు. ఇందులో భాగంగా ఆలయం, రాజగోపురం, ఆలయ పరిసరాల్లో విద్యుద్దీపాలు ఏర్పాటు చేశారు. చైర్మన్‌ చాంబర్‌ ఎదుట విశాలమైన కల్యాణ వేదికను నిర్మించి పూలతో అలంకరించారు.