హిందీని రుద్దాలని చూస్తే..: సీఎం స్టాలిన్
ABN , First Publish Date - 2022-01-26T16:33:14+05:30 IST
తమిళ భాష కోసం త్యాగాలు చేసిన వారిని గుర్తు చేసుకుంటూ రాష్ట్రంలో డీఎంకే యువ విభాగం ఆధ్వర్యంలో ఏర్పాటు చేసిన కార్యక్రమంలో వర్చువల్ ద్వారా సీఎం స్టాలిన్ పాల్గొని ప్రసంగించారు. ‘‘1938లో తమిళ భాష పరిరక్షణ ఉద్యమాన్ని పెరియార్..
చెన్నై: తాము హిందీకి వ్యతిరేకం కాదని, కానీ బలవంతంగా అమలు చేయాలని చూస్తే వ్యతిరేకించక తప్పదని తమిళనాడు ముఖ్యమంత్రి ఎంకే స్టాలిన్ హెచ్చరించారు. ఎవరి భాష పట్ల వారికి ప్రేమ, గౌరవం ఉంటాయని, తమ భాషను కాపాడుకోవడానికి ఇతర భాషలను తమ పరిధిలోకి రాకుండా చూసుకోవడంలో తప్పేం లేదని ఆయన అన్నారు. తమిళులు తమ భాషను కాపాడుకోవడానికి హిందీని వ్యతిరేకించడం తప్పుగా భావించరాదని, అలా భావిస్తే అది సంకుచిత మనస్తత్వం అవుతుందని స్టాలిన్ అన్నారు.
తమిళ భాష కోసం త్యాగాలు చేసిన వారిని గుర్తు చేసుకుంటూ రాష్ట్రంలో డీఎంకే యువ విభాగం ఆధ్వర్యంలో ఏర్పాటు చేసిన కార్యక్రమంలో వర్చువల్ ద్వారా సీఎం స్టాలిన్ పాల్గొని ప్రసంగించారు. ‘‘1938లో తమిళ భాష పరిరక్షణ ఉద్యమాన్ని పెరియార్ ప్రారంభించారు. 2022లో నేటికి తమిళనాడు దానికి కట్టుబడి ఉంది. పెరియార్ ఆశయాలను ఆచరిస్తూ ఆయన చూపిన మార్గంలోనే నడుస్తోంది. మేము ఏ భాషకూ వ్యతిరేకం కాదు. కానీ బలవంతంగా మాపై హిందీని రుద్దాలని చూస్తే గట్టిగానే ప్రతిఘటిస్తాం’’ అని స్టాలిన్ అన్నారు.
