ఎకరం పంటకు 2 గంటల్లో యూరియా
ABN , First Publish Date - 2020-07-07T07:11:57+05:30 IST
పంటలను కోతుల బెడద నుంచి రక్షించేందుకు గతంలో మంకీ గన్ తయారు చేసిన నిజామాబాద్ జిల్లా ఏర్గట్లకు చెందిన యువరైతు పొత్కూరి మహేష్
ఏర్గట్ల, జూలై 6: పంటలను కోతుల బెడద నుంచి రక్షించేందుకు గతంలో మంకీ గన్ తయారు చేసిన నిజామాబాద్ జిల్లా ఏర్గట్లకు చెందిన యువరైతు పొత్కూరి మహేష్ అదే ఉత్సాహంతో ఇప్పుడు మరో పరికరం తయారు చేశారు. ప్రస్తుతం వ్యవసాయ పనులన్నీ దాదాపు యంత్రాలతోనే చేస్తున్నారు. అయినా కొన్ని పనులకు కూలీల అవసరం తప్పడం లేదు. ప్రధానంగా యూరియా వేసే సమయంలో ఎకరానికి తప్పనిసరిగా ఐదుగురు కూలీలు అవసరమవుతున్నారు. ప్రస్తుతం కూలీల కొరత తీవ్రంగా ఉండడంతో ఈ సమస్యను అధిగమించేందుకు మహేష్ మరో సరికొత్త ఆలోచన చేశారు. ఇందు కోసం ఫెర్టిలైజర్ గన్ తయారు చేశారు. తను సాగుచేసిన ఎకరం మొక్కజొన్న పంటలో మొక్క కింది భాగంలో ఈ గన్తో రెండు గంటల్లో యూరియా వేయడం పూర్తి చేశారు. ఈ గన్ను కేవలం రూ.320తో తయారు చేసినట్లు ఆయన చెప్పారు. అరంగుళం ఫైప్లు 3, అంగుళం క్లిప్పు, అంగుళం డమ్మిక్యాప్, ఒక బ్యాగ్, అరంగుళన్నర పీవీసీ పైప్, ఒక సాల్వెంట్, ఒక రప్పను ఉపయోగించి దీనిని తయారు చేశారు. ఈ గన్ అవసరమైనవారు 9490207184కు కాల్ చేసి తనను సంప్రదిస్తే వివరాలు చెబుతానన్నారు.